Canavar ayın (oktäbri) 2-3 günnerindä, “Umay Ana Türk Dünnäsı Kadınnar Birlii”n koordinatorluunda, Azerbaycanın başkasabasının Hazar universitetında geçti II-ci Halklararası “Türk dünnäsında Kadın Çalıştayı” fotumu, angısına katıldı türk dünnäsının 15 devletindän ham memleketindän karı kulluu insannar.
Bakuda olan bu forumda pay alan kultura, bilim, cümne hem politika uurunda karılar önä sürdülär karıların katılmasında kultura, üüredicilik hem biznes soruşların incelenmesini. Gagauziyadan karıları bu forumda temsil etti Gagauziya kultura Upravleniyasının başı Marina SEMÖNOVA.
Bu önemni forumun temel konusu oldu – karıların arasında marafetlik diişmekleri, kultura varlıın korunmasında hem geliştirilmesindä karıların rolü, üüredicilik inițiativaların kaavileşmesindä hem birleşik kultura alanı yaratmakta dialog kurmak.
II-ci Halklararası “Türk dünnäsında Kadın Çalıştayı” forumuna katkıda bulundular: Türkiye kultura hem turizma ministerlii, TİKA (Türk İşbirlii hem Koordinaţiya Agenstvosu Başkannıı), YTB (Yurtdışı Türklär hem Soy Topluluklar Başkannıı), TÜRKSOY (Halklararası Türk Kulturası Kuruluşu), DATÜ (Dünneyin Meshetin Türkleri Birlii), GİKAD (Kıpra Türk Biznes Kadınlar Dernää), TÜRKKAB (Türk Kadın Bilimcileri Dernää), İstanbul Gedik Universitetı hem İstanbul Azerbaycan Dostluk Dernää.
