Gagauziya Radio hem Televideniye (GRT) kompaniyasının dolayında yıllarlan türlü boralar esti. Ama o boralar kaavi hem temelinä oturmuş GRTya büük zararlar yapamazdılar. Ozaman, GRTyı daatmak için, onu içindän sökmää başladılar. Sökennär da belli. Belli onnar da kim GRT yok eder hem yok edennerin arkasında durêr. Onnarı Gagauziyada hepsi biler.
Ama neçin GRTyı yok etmää savaşêrlar pek meraklı?!
Kim ne därsä desin, ama GRTnın yok etmä sebepini taa bıldır açıkladı GRTnın Gözledici Suvetin azası: На ГРТ слишком много передач на гагаузском. Моя жена не понимает этот язык. Надо больше давать передач на русском языке.
Buradan GRTnın yok etmä sebepin en birinci noktası: gagauz dilini efirdan yok etmää.
Bu en büük sebep.
İkinci sebep ta – para!!!
GRT kompaniyasında en islää hem en paalı oborudovaniye. GRT Gagauziyada retranslätor direklerin saabisi. Bunnarı hepsini GRTya TİKA yolunnan Türkiye Respublikası baaşladı. Kadroları da Türkiye üüretti. TİKA bunca para hem bunca mal burayı koydu! Şindi o mallar kimä geçecek? Onnarın saabisi kim olacek?
Cuvap belli: onnara kimin para için gözleri kararmış. Çünkü Moldova dicital (ţıfravoe veşçanie) TVya geçer. Kimin elindä retranslätorlar olacek – onun cöbünä da paralar akacek. Zerä hepsi TV kanalları onnara baş uracek.
Sanêrsınız GRTyı yok edennär hiç mi düşünmeerlär, ani GRTnın daalması hem yok edilmesi bu gagauz dilin sandıına (tabuduna) kakılan en büük enserledän birisi. Düşünerlär hem bilerlär! Ama bunu bilä-bilä yapêrlar, zerä onnara GAGAUZ DİLİ hem GAGAUZLUK diil lääzım, GAGAUZ RUHLU insannar da diil lääzım. Onnara gagauzların kafasına hem içinä yabancı köklü hem yabancı ruhlu bir dil sokmaa (kendi cöplerinä da para sokmaa) lääzım. Bunun için da GRTylan – “kim bozmazsa kör olsun!” yapêrlar.
Hem taa bir iş: bu “kim bozmazsa kör olsun” boranın içindä GRTda işleyän insannarı da hiç birisi düşünmeer. Onnarlan ne olacek hiç birisinin umurunda da diil. Belliki o insannar yol üstündä kalmayaceklar, zerä onnar atık profesional oldu. Ama eni profesianalları büütmää deyni çok vakıt lääzım olacek. Vakıt sa hiç kalmadı artık.
Todur ZANET
