Orak ayın (iyül) 6-da Gagauziyanın başkasabasında Komratta geçti bir Kruçalı örüyüş, angısının uuruydu aylä hem adetlerimiz olan paalılıklarımızın korunması, hristiannık için hem yaamur yaasın deyni dualar.
Kruça örüyüşü için insannar toplandılar Komrat İoan Vatizedici klisesinä. Burada, Göktä Bobaya dualardan sora, Kruçalı örüyüş yollandı Komrat yakınnarında bulunan Kıpçak bayırına, angısı var hem sayılêr gagauzların ruh üüselişin hem dayanıklıın simvolu.
Yolca din türküleri çalarak hem dualar yaparak, Kruçalı örüyüş etişti Kıpçak bayırına da burada bulunan Dua kruçasının dolayında örüyüşta pay alan insannar hem popazlar birleşik dua ettilär barış, aylä paalılıkları, hristian adetleri, mutluluk, bereket, selemet hem yaamur için.
