Başlatıp Kirez ayın (iyün) 1-ndä Orak ayın (iyül) 20-dän Komratta, Gagauziyanın baş stadionunda, geçti “MEDIA FOOTBALL LEAGUE CUP COMRAT” (“MFL CUP 2025”) futbol turnirı. Onun finalı hem ödüllemä sırası Orak ayın (iyül) 20-dä oldu.
“Komrat Kuboona Mediya Futbol Ligı – 2025” (“MFL CUP 2025”) finalında karşı geldilär “Constructorul” (Leova) – FK “Kongaz” (Kongaz) komandaları. Keskin hem meraklı bir matçta 0:1 ensedi FK “Kongaz” komandası. Ölecä “MFL CUP 2025” turnirın altın medalileri hem Kuboo Kongaza gitti! Gümüş medalilär Leova kasabasının “Constructorul” verildi.
Hep o günü 3-cü er için oynadılar FK “Kara Beygir” (Komrat) – FK “Betacon Plus” (Komrat). Bu matçta 4:1 ensedi FK “Kara Beygir” komandası.
“MFL CUP 2025” turnirın ödüllemä sırasında, bu yarışmayı kuran insannar Genadiy TULBA hem Sergey MİLKAN şükür ettlär hepsinä, kim pay aldı bu unudulmaz turnirda: futbolculara, sudyalara hem taraftarlara, “Mediya Futbol Ligı – 2025” ortaklarına hem dostlarına, sponsorlara.
Еurnirını kuran hem hazırlayan Komrat kasabasının Munițipiy Sport Şkolasının (MSŞ) direktoru Gavril Borisoviç TULBA, Danışarak turnirın hazırlamak komandasına, urguladı: “Baş iilderim sizin işinizin, cuvapçılıınızın hem turnir için yanmanızın önündä. Sizsiz bu yortu olamayaceydı – sudyalar komandası, mediya komandası, teknik komandası, hepsi komandaların temsilcileri! Hem, belliki, şindi artık hepsicii bekleer eni futbol sezonunu hem “MFL CUP”un sıradakı turnirını. Büün biz Moldovada sportun eni sayfasını yazêrız! Birliktä – koca bir kuvediz!”
“Komrat Kuboona Mediya Futbol Ligı – 2025” (“MFL CUP 2025”) turnirin en çok gol atan bombardirları da belli oldu; 7-şär gol attılar – Stanislav DOBRİOGLU (FK “Betacon Plus”) hem Dimitriy KALARAŞ (FK “Kara Beygir”), 6-şar gol attılar – Yuriy STANÇEV (FK “Betacon Plus”) hem Pavel PULUKÇU (FK “Kongaz”).
