Birleşmiş Milletlär Birliin (BMB) 80-ci sesiyasında nasaat edän Türkiye Prezidentı Recep Tayyip ERDOĞAN urguladı, ani “geldi vakıt dünnä cümnesi zorbalanan palistinalıların tarafına insannık adına geçsin”.
Prezident ERDOĞAN urguladı, ani “Son üzyılda insannık, Gazadakı İzrail tarafından yapılan soykırımına benzär bir canavarlık görmedi. Amerikada, Evrupada, dünneyin dört bir tarafında, analar-bobalar ürekleri uşaklarının elinä batan küçük bir kıymık beterinä kırılırkan, Gazada uşakların ellerinnän ayakları anesteziyasız kesilerlär. Bu – insannıın en dip noktasıdır”.
Türkiyenin başı dedi: “İzrailin yaptıkları terorizmaylan düüşmäk diil, zerä bu – 7 oktäbri uydurma sebepinnän yapılan okupațiya, deportațiya politikası, sürgünnük, soykırımı, taa doorusu toplu öldürmäk politikası”.
Prezident ERDOĞANın laflarına görä, İzrail “Gazaylan hem Batı kenarınnan sınırlı kalmayıp, Siriyeyä, İrana, Yemenä hem Livana saldırarak, bölgedeki barışı kuşku eder”.
Türkiye Prezidentı söledi, ani lääzım “soykırımdan sorumnu olannar halklararası yustițiya çerçevesindä esap vermeyä çekilsinnär” hem “bunun kesinniklä gerçekleşeciinä” inandıını urguladı.
Başka konuları da naasatında önä sürän Prezident ERDOĞAN, KKTC (Poyraz Kipra Türk Respublikası) konusuna geçeräk, çaardı, ani halklararası cümne lääzım tanısın Poyraz Kipra Türk Respublikasını hem onunnan diplomatiya, politika hem ekonomika ilişkileri kursun, bildirer Anadolu angenstvosu.
Patret: Anadolu angenstvosunun.
