9 Mayda bakılan II-ci dünnä cengindä “Enseyiş Günü”nü hem Evropada 8 May günündä kutlanan “Evropa Günü”nü, bireri toplayıp, Moldova kuvetleri bu günneri bilä kutlamaa karar verdi. Bu iş, neredä sä, insannarı ikiyä böldü.
Moldova öndercileri 9 May sabaasında etiştirdilär II-ci dünnä cengindä Enseyiş Gününä saygı göstermää hem da taa sora, üülendän, “Evropa Günü”nü da Kişinevun merkez meydanına toplanan insannarın aralarında tantanalı bakmaa.
Hederlez ayın 9-da, sabaalen, Moldova Prezidentı Maya SANDU, Moldova Parlamentın spikerı İgor GROSU hem Evropa bücet hem administrațiyalık komisarı Johannes HAHN, II-ci dünnä cengindä ölän askelerin anması için Kişinev “Sonsuzluk” (“Eternitate”) Memorial Kompleksında düzennenän sırada pay aldılar hem burada yanan “Sonsuz ateş” yanına venok hem çiçek koydular. Bununnan Moldova öndercilerinin II-ci dünnä cengindä Enseyiş Günü bakması bitti da çeketti “Evropa Günü”n tantanalı bakılması.
“Evropa Günü”n kutlamasının açılışını yaparak, Moldova Prezidentı Maya SANDU kendi sözündä urguladı: “Moldova Respublikası Evropa Birliini seçer, çünkü barış – bizim öncülüümüz!”
Açılış sırasından sora, Prezident Maya SANDU, Moldova Parlamentın spikerı İgor GROSU, Evropa bücet hem administrațiyalık komisarı Johannes HAHN hem başka politikacılar, meydanda “Evropa kasabası” çadırlarını gezdilär.
Evropa diplomatlık temsilcilerin çadırlarından kaarä, meydanda türlü şenniklär hem sergilär vardı. Onnarın arasında, bizä görä, pek meraklı biriydi – NATO silähların hem askerlerin sergisi. Halizdän – “Si vis pacem, para bellum”: isteersin barış, hazırlan cengä.
Taa sora, Maya SANDU verdi Evropa bücet hem administrațiyalık komisarına Johannes HAHNa Moldova Respublikasının “Ordinul de Onoare” ordenını.
Bu arada Kişinevda, Gagauziyada, Belț hem taa bașka birkaç kasabada II-ci dünnä cengindä “Enseyiş Günü”n kutlaması insannar arasında ilerlärdi.
Kişinevda, sabaalen merkez meydanından “Sonsuzluk” (“Eternitate”) Memorial Kompleksına yollanan insan dolusu kolonna erinä etiştiydi hem burada veterannarı kutlamaylan raametlilerä saygı sıraları gidärdilär.
Kişinevda “Hepsimizä bir enseyiş” avtoprobegı yapıldı, angısında pay aldılar üzdän zeedä maşina hem bindän zeedä insan. Bundan kaarä “Ölümsüz polk” örüyüşü oldu.
Gagauziyanın kasabalarında hem küüylerin çoyunda Kurtarıcı-askerlerin memoriallarına hem pamätniklerinä çiçeklär hem venoklar koyuldu, saygı sıraları yapıldı, teatrulu gösterilär hem konțertlär düzennendi.
Bakmadaa ona, ani Hederlez ayın 9-da Moldovada hepsi karıştı: insannıklan insannık, “Enseyiş Günü”nän “Evropa Günü”, Kızıl Askeri hem NATO, o gün haliz yortulu oldu hepsinä, kim unutmadı geçmişi hem gelecää umutlan bakêr.
