(Gagauziyan M.V. Maruneviç adına Bilim-aaraştırma Merkezi 10-cu yıldönümünü kutladı)
Kırım ayın (dekabri) 20-dä kendisinin ilk tombarlak yoldönümünü kutladı Gagauziya M.V. Maruneviç adına Bilim-aaraştırma Merkezi, angısı yaşını Kasım ayında tamamnadı.
Gagauziyan M.V. Maruneviç adına Bilim-aaraştırma Merkezi yıldönümü kutlamaa deyni Gagauziyaya büün toplandılar bilim adamnarı Moldovadan, Türkiyedän, Rusiyadan hem Ukraynadan. Sıraya geldilär Gagauziyanın öndercileri, Halk Topluşun deputatları, Gagauziyanın şkolaların direktorları hem üüredicileri, kultura zaametçileri, popazlar, yazıcılar hem taa çok başka insannar.
Önemni bu sırada Moldovanın hem Gagauziyanın Gimnalarına saygı gösterildi, nedän sora Gagauziya M.V. Maruneviç adına Bilim-aaraştırma Merkezini tanıştırmaa deyni kısa bi film gösterildi. Sora Bilim-aaraştırma Merkezin başı İrina KONSTANTİNOVA 10 yılın içindä temel uurlarda yaptıkalrı için gözäl, derin hem detalli bir doklad okudu. Canabisinin nasaatı zamanı arkadakı büük ekranda dokladta verilän bilgilär vidioylan kesinneştirildi.
Gagauziyanın M.V. Maruneviç adına Bilim-aaraştırma Merkezin yıldönümü kutlamaa deyni söz verildi burada bulunan Gagauziya Başkanına, angısı, neçin sä, nasaat erinä, sıraya uymayan, ekologiya için naşeysa yapraktan okudu.
Bu iki nasaattan sora, Gagauziyanın M.V. Maruneviç adına Bilim-aaraştırma Merkezin ödülleri, medalileri hem Aza-korespondent kimnikleri verildi. Ödülleri kabledennerin arasında vardılar ilk öncä TİKA Kişinev programaların Koordinatoru Selda ÖZDENOĞLU hem Türkiye Komrat Başkonsulu Hasan AKDOĞAN da.
Ödüllerini, medalilerini hem kimniklerini kabledän insannar da boş ellän gelmemiştilär dä Bilim-aaraştırma Merkezi için kutlama sözlerini sölärdilär hem kendi Baaşışlarını baaşlardılar. Ölä, baaşışları verärkenä, Moldova Mitropoliyasını teslim edän popazlar taktılar Gagauziyanın M.V. Maruneviç adına Bilim-aaraştırma Merkezin başının İrina KONSTANTİNOVAnın güüsünä “Paraskiva” medalisini, angısınnan Canabisi ödüllenmişti.
Bütün yıldönümü sırasında yan ekrannarda gösterildi Mariya MARUNEVİÇlän videolar.
Kutlamaların ofițial payı bittiynän, yortuya katılan insannarın çoyu da kendi baaşışlarını Bilim-aaraştırma Merkezinä baaşladılar. Onnarın arasında vardı gazetamızın redaktoru Akademik Todur ZANET tä, angısı baaşladı kendi kiyadını “Gagauziya M.Maruneviç Bilim-aaraştırma Merkezin 10-cu yıldönümünä”
peetinnän:
“Bilim Merkezinä bak –
On yaşında bir uşak!
Tez hem çabuk kalkınêr –
İleri dooru bakêr!
Uurları, keezi belli –
Doorudan hep ileri!
Kalêr salt dua etmää
Hem dä bilä örümää!
Kalmaasınız yavana –
Er olmasın yalana!
Görünsün o zaametin –
Bu laflar T. ZANETin!”
Söz gelişi, 2011-ci yılda Bilim-aaraştırma Merkezin dokumentleri taa çok Türkiye İsparta Suleymen DEMİREL Universiteti topraklarında hazırlanırdı, neredä çalışırdı Prof. Dr. Stepan VARBAN, angısı bu dokumentleri ozaman rusça hazırlardı. Hep ozaman, “Gagauzlar hem Gagauzluk” bilim-dokumental filmın montajını yaparkana, orada bulundu Todur ZANET tä, angısı yardımcı oldu Canabisinä bu iştä hem da kendi elinnän hem fikirinnän rusçadan gagauzçaya çevirdi bu cümleyi: “Gagauziya M.V. Maruneviç adına Bilim-aaraştırma Merkezi”, angısı oldu Gagauziya Bilimi gemisinn halizdän adı da o gemi, batmadaan, büük dalgalardan hem okeannardan Gagauz bilimini götürer, çünkü nicä geminin adını koyacan ölä dä üzecek.
