anmak_cadir (2)

19.07.2021, tarafından yazılı , CÜMNE, POLİTİKA BÖLÜMÜ, 7674 KERÄ BAKILMIŞ

Türkiyenin 2016-cı yılın 15 Temmuz şehitlerinä Gagauziyada saygı

2021-ci yılın Orak ayın (iyül) 16-da Gagauziyanın Çadır kasabasında, Türkiye Respublikasının “Demokratiya hem Milli Birlik Günü” çerçevesindä, oldu bir sıra, neredä saygıylan andılar 2016-cı yılın 15 Temmuz (Orak ayın (iyül) 15-şi) gecesi FETÖ tarafından Türkiyedä devlet devrimi denemesinä karşı koyan 251 şehiti hem yaralannan insannarı. Saygı sırası geçti Çadır kasabasının primariyasının kararınnan hem Türkiye Türk İşbirlii hem Koordinaţiya Agenstvosu Başkannıın (TİKA) yardımınnan kurulan “İzmit kardaşlık parkında”, neredä bulunêr şehitleri anmak nışan taşı.

 

Sıra başladı susma saygısı duruşundan, nedän sora burada pay alan Türkiye Kişinev Büükelçisi Gürol SÖKMENSÜER, Gagauziyanın Başkanı İrina VLAH, TİKA Kişinev programaların Koordinatoru Selda ÖZDENOĞLU, Türkiye Respublikasının Gagauziya Komrat Başkonsulu Hasan AKDOĞAN, Çadır kasabasının primarı Anatoly TOPAL, Türkiye Kişinev Büükelçiliin hem  Gagauziya Komrat Başkonsullun zaametçileri hem başka insannar şehitleri anmak nışan taşına çiçek koydular.

Çiçek koymak sırasından sora Türkiye Kişinev Büükelçisi Gürol SÖKMENSÜER, nasaat ederäk, annattı o 5 yıl geeri olan olayları, “Demokratiya hem Milli Birlik Günü” önemni olması için hem urguladı, ani 2016-cı yılın 15 Temmuz (Orak ayın (iyül) 15-şi) gecesi FETÖ tarafından Türkiyedä devlet devrimi denemesinä karşı koyan 251 şehit hem iki bindän zeedä yaralannan insannar, ani korudular demokratiyayı, hiç bir zaman unudulmayaceklar.

Sora da, yazılı kiyattan nasaatını okudu Gagauziyanın Başkanı İrina VLAH.

Saygı sırasının sonunda, “Demokratiya hem Milli Birlik Günü”n 5-ci yıldönümünnän ilgili olarak, Büükelçilik tarafından uşaklar arasında yapılan incäzanaat yarışmasında birinci eri kazanana ödül verildi – THY tarafından ayırılmış Kişinev-İstanbul gidiş-dönüş bileti.
anmak_cadir (1)
anmak_cadir (3)
anmak_cadir (4)

BİR CUVAP YAZIN