Büük ayın (yanvar) 19-da Komrat Kultura Evindä oldu prezentațiya gagauz uşaklarına deyni “Gagauzum bän”, “Masal küpü 1”, “Masal küpü 2” kiyatlarına, angıları yapıldı Gagauziya M.V. Maruneviç adına Bilim-aaraştırma Merkezinnän “Meras” dernää işbirliindä. Kiyatların çıkarılması için, “Gagauzça Çocuk Kitapları Serisi Projesi” çerçevesindä, para yardımı yapıldı Türkiye YTB (Türkiye Yurtdışı Türklär hem Soy Topluluklar Başkannıı) tarafından.
Kiyatlar açılêr Türkiye Yurtdışı Türklär hem Soy Topluluklar Başkanı Abdullah ERENin danışmasınnan.
“Gagauzum bän” kiyadına toplu gagauzka poetesaların Aleksandra BUJİLOVAnın, Pelageyä FİLİOGLUnun, Aleksandra KRİSTOVAnın, Güllü KARANFİLin hem Galina SİRKELİnin peetleri. O üzerä taa doorusu olaceydı bu kiyadın adını koymaa “Gagauzkayım bän”.
“Masal küpü 1” hem “Masal küpü 2” kiyatlarında verili gagauz hem başka halkların halk masalları, angılarını erleştirmişlär hem gagauz dilinä çevirmişlär hep bu insannar.
Kiyatların tirajları bölä: “Gagauzum bän” – 1500 ekzemplär, “Masal küpü 1” – 1000 ekzemplär, “Masal küpü 2” – 1000 ekzemplär.
