Hederlez ayın 13-16 günnerindä Türkiyenin Erzincan Binali Yıldırm Universitetında geçti “6-cı Türk Dünnäsı Ozannar Şöleni hem Ali Ekber Çiçek Anısına Aşık Literaturası Çalıştayı”, angısı Erzincan Valilii, Erzincan Binali Yıldırm Universitetı, Erzincan belediyesi (primariyası), Türkiye kultura hem turizma Ministerlii, Türk İşbirlii hem Koordinaţiya Agenstvosu (TİKA), Türkiyenin Yurtdışı Türklär hem Akraba Topluluklar Başkannıı (YTB), Türkiye Yunus Emre İnstitutu hem Dede Korkut Ozannar Dernää işbirliindä düzennendi.
Erzincan Binali Yıldırım Universitetın rektoru Prof. Dr. Akın LEVENTın hem bu Universitetın incäzanaat hem literatura fakultetın Türk dili literaturası kafedrasının azası Prof. Dr. Ali KAFKASYALInın buyur edilmesinä görä, “6-cı Türk Dünnääsı Ozannar Şöleni hem Ali Ekber Çiçek Anısına Aşık Literaturası Çalıştayı”na Türkiyedän, Azerbaycandan, İrandan, Kazahstandan, Özbekistandan ozannar, aşıklar, akınnar, babşilär hem bahşilär geldilär. Bundan kaarä burayı buyur edilmişti taa Dou Turkistandan, Kitaydan Balkannara kadar, Gruziyadan, Poyraz Makedoniyadan hem Gagauziyadan bilim hem incäzanaat insannarı da. Onnarın arasında vardı Akademik Todur ZANET ta.
Çalıştayın birinci günündä türk dünnäsından ozannar, aşıklar, akınnar, babşilär hem bahşilär, Erzincan kasabasının insannarına deyni, kasabanın, Türk dünnäsının bayraklarınnan donaklı, baş meydanında uzun bir konțert gösterdilär. Konțerttä, erli ozannardan hem aşıklardan kaarä, Şolenä gelän azerbaycannı, irannı (azerbaycan, türkmen hem kaşkay halkların temsilcileri), kazahlı, özbekistannı ustalar talantlarını gösterdilär.
“6-cı Türk Dünnääsı Ozannar Şöleni hem Ali Ekber Çiçek Anısına Aşık Literaturası Çalıştayı” ana sırası Hederlez ayın 15-dä Erzincan Binali Yıldırm Universitetın “Prof. Dr. Erdoğan Büyükkasap Kongres hem Kultura Merkezi”ndä geçti. Eski türk devletlerin bayraklarınnan donaklı Şölenin sțenasında olan ana sırasının ilk payında açılış nasaatını Erzincan Binali Yıldırım Universitetın rektoru Prof. Dr. Akın LEVENT hem Prof. Dr. Ali KAFKASYALI yaptıktan sora, protokol sözleri için sțenaya Azerbaycan, Kazahstan, Özbekistan, Moldova (Gagauziya), İran hem Bulgariya devletlerindän gelän bilim insannarı buyur edildi. Hep bu zaman Prof. Dr. Jabbor ESHONQUL baaşladı Erzincan Binali Yıldırım Universitetın rektoruna Özbekistan milli halatını baaşladı. Burada Ozan Nihat unudulmaz bir hava çaldı hem türkü söledi.
Şölenin ana sırasının ikinci payında, ilktän Prof. Dr. Ali KAFKASYALI, sora da Prof. Dr. Hayrettin İVGİNın başkannıında “Ali Ekber Çiçek Anısına Aşık Literaturası Çalıştayı” gerçekleşti. Burada pay alan bilim kultura insannarı bu konuda kendi fikirlerini hem tekliflerini açıkladılar. Ortaya “Türk Dünnäsı Ozannar Birlii” kurulması konusu da koyuldu, ama son karara görä şindilik “Dede Korkut Ozannar Birlii” kuruldu.
Ayrıca Akademik Todur ZANET baaşladı Şölenä kendisinin TİKA yardımınnan hazırladıı hem eni çıkan 6 tomnuk “Büük Gagauzça-Rusça Sözlük” takımını, “Gagauzların kayıp olan dilinin hem kultura adetlerinin Moldovada korunması” adlı 3 tomnuk bilim kiyatlarını hem dä aaraştırma, annatmaklar, dramaturgiya hem peet kiyatlarını da.
Avşamneyin, “6-cı Türk Dünnääsı Ozannar Şöleni hem Ali Ekber Çiçek Anısına Aşık Literaturası Çalıştayı” büük bir konțertlan başarıldı. Konțert Türkiyenin Gimnasının çalmasınnan başladı. Ardından usta ozan Ali Ekber ÇİÇEK yaşaması hem yaratmaları için sțenadan annattılar onun kızı Ebru ÇİÇEK hem Prof. Dr. Ali KAFKASYALI.
Konțert programasında taa bir meraklı iş oldu. Azerbaycanın en anlmış aşıın Aşık ALESKERin unukusının unukası Hatayı ALESKERLİ Azerbaycanın “Dede Alesker Ocaa” halk dernää adından ödülledi Prof. Dr. Ali KAFKASYALI bu Ocaan en büük ödülünnän – Aşık Aleskerin duuma günün 200-cü yılın anmasına basılan “Aşık Alesker – 200” altın yubiley medalisinnän, angısı verildi Canabisinä büük ustalıı, Türk dünnäsında aşıklık zanaatını gelişmesinä yaptıı katkıları, bilimnär hem literatura uurunda kıymetli çalışmaları hem paalı zaametleri için.
Şolenin konțert programasında pay aldılar Türkiyedän Aşık Günay YILDIZ, Aşık Kul NURİ hem ozan Hüseyin BAYRAM, Aşık Fuat ÇERKEZOĞLU hem Aşık Yaşar SARIKAYA, Aşık Abidin ÇINAR, Ozan NİHAT. Bu aşıkların aralarında İranın Türkmenistanından gelän babşiler Babşı Ebrahim JORCANİ, Babşı Meysam SHAERİ hem Babşı Hemat AGH, Kazakistanın akınnarı Bekaus NURİMAN hem Maleyke ALDAMZHAROVA, Azerbaycan aşıkları Şöhret KERİMOV, Buşlan MEMMADOV hem İbad ALLAHVERDİYEV zengin muzıkalarınnan sesleycileri büüledilär.
Aarlı halk ozanı Binali KILIÇlan Aşık Mevlit MERDOĞLUnun karşılı atışmaları, konțertä ilgi çekän gösterilerdän biri oldu.
Programanın sonunda Özbekistandan Bahşı Rasulbek ABDURRAHMANOV hem Doç. Dr. İzzat MATYAKUBOV sțenaya çıkmasınnan hem türkmen halk ozanı Bahşı Abdullah KÖSEnin katılmasınnan sona yaklaştı. Bahşı Abdullah KÖSE, orkestralı düzennemäylän “Anayurt Marşı”nı çalmasınnan hem bu sırada zal içindä türk bayrakların sallanmasınnan konțert başarıldı.
Şölenä katılannara deyni Erzincan kasabasında hem dolay küülerindä tanıtmak gezisi da yapıldı.
