Harman ayın (avgust) 14-dä, maasuz “Gagauz kilimneri” Festivalinä Aydar küüyündä tantalalı açıldı 128 yıllık el dermeni, angısının, maamilä surat, kurturulması hem enilenmesi geçennerdä Evropa Birliin “Güvennii kaavileştirmä sıraları” Programasının çerçevesindä 800 bin ley paraya yapılmış.
Ani Aydar küüyündä bu 128 yıllık el dermenin restovrațiyası halak-bulak yapılmıştı taa uzaktan görünärdi. Ama, ani, sade göz boyamaa deyni orada bukadaradan halak-bulak “iş yapılmış” inanamazdık. Onuştan, açan Aydardan geldi haber, ani 128 yıl türlü lüzgerlerä hem fırtınalara daynan dermen Harman ayın (avgust) 30-da bir boradan darmadaan olmuş, karar aldık işi irindä görmää.
Aydara maasuz gidip, şaşılacak iş gördük: dermenin restovrațiyasını salkım ya da meşa taftaların erinä çürük cam taftalarınnan yapmışlar. Evelki aaçları çatlaklarına hem lataların bașlarına birär-ikişär enser kakmışlar da bukadar. Küçük uşaa da belli, ani bu enserlär hiç tutulmêêr da, diil, ani boraya dayansınnar. Dermenin kanatları hep ölä o taftalarlan hem latalarlan yapılı, onuştan lüzgär onunnarı çivi gibi kırmış.
Bir şüpesiz var nicä demää, ani Evropa Birliin “Güvennii kaavileştirmä sıraları” Programasının çerçevesindä Aydara verilän 800 bin leyi lüzgerä uçtu, ama kimin ceplerinä kondu, sade bir Allaa biler!?
