2022-ci yılın Ceviz ayın (sentäbri) 1-4 günneri arası İstanbulun Beykent Universitetında “Balkannarda VIII. Halklararası Balkan istorya aaraştırmaları Simpoziumu” geçti, angısına Türk İşbirlii hem Koordinaţiya Agenstvosunun (TİKA) Başkan Yardımcısı Dr. Mahmut ÇEVİK katıldı hem “Balkannarda 100-ä yakın material varlıını ayaa kaldırdık” konusunda konuşma yaptı.
TİKA Başkan Yardımcısı Dr. Mahmut ÇEVİK tribunadan nasaat ederäk, TİKAnın Balkannarda yapılan çalışmalarını hem zaametlerini bölä annattı: “Umut ederim, anin büünkü buluşmamız ortak istoriyamıza şafk tutacek hem geçmesini hem istoriyalı artefaktlarımızı gelecek boylara aktarılması konusunda katkı saalayacek.
İstoriyanun en eski milletlerindän olan türk milletin dolay dünnäya kendi görüşü vardı. Ayırı din, dil hem kimnikleri olan toplumnara saygı gösterileräk, 500 yıl boyunca 1 milion km kvadratı Balkan yarım adasında kaldık. Balkannarda olan 11 koordinatorluk ofisimizlän Balkannarda 100-ä yakın material varlıını ayaa kaldırdık. 15 istoriyalı yapının restovrațiya proektını tamamnadık hem 10-dan zeedä istoriyalı yapıların da restovrațiya için proektların hazırlama çalışmalarını yapêrız. Manastırda asker üçilişçesindän Kosovadakı “Yaşar Paşa” camisinä, Podgorițadaki saat kalesindän Bosniyadakı “Drina köprüsü”nä hem “Maglaj” camisinä, Serbiyada “Ram Kalesi”ndän Sienița “Valide Sultan” camisinä, Tirana “Ethem Bey hem Berat Bekarlar” camisindän Jirokastra saat kulesinä bütün istoriya artefaktlarına dokunêrız. Onnarı gelecek boylara aktarımlarını saaladık.
Vengriyada “Gülbaba Türbesinin” restovrațiyasını hem muzeyin yapımından Peç kasabasında da Türk çeşmesi restovrațiyasına katkı saaladık. Orta Aziya, Afrika, Kafkaz hem Uzak Douda da ortak istoriya artefaktlarına saabi çıkêrız. Aljirda “Kecova” cami, Azerbaycanda “Nuri Paşa” muzey evi, Mongoliyada “Bilge Tonyukuk Yazıtları”, Sudanda “Ali Dinar” muzey evi, Efiopiyada “Necaşi Türbesi”, Kazakistanda “Yesevi Türbesi” – bunnardan sadecä bir kaçıdır. Material olmayan kultura varlıı olarak ta, her toplum kulturasını yaşatsın deyni, peet, türkü, halk oyunnarı h.t.b. alannarda kultura merkezleri düzdük. Gagauz kilimin gelecek boylara aktarımı için atolyelär kurduk. Bizim uurumuz – Halklararası kabul görmüş koruma teknikalarlan yarattıkalırımızı ayaa kaldırılmasınnan birliktä, yaşama kulturamızı sürdürüläbilir olmasıdır”.
