Harman ayın (avgust) 1-dä oldu Gagauziya Halk Topluşu lingvistika komisiyasının oturuşu geçti, neredä inceledi bir soruş: Gagauziya İspolkomun kandidat olan kişilerin gagauz dilini bilmeleri.
Lingvistika komisiyasının kararına görä, teklif edilän Gagauziya İspolkomuna kandidatların 33% gagauzça bilmeer – bu 7 kişi. Onnar hepsi adadılar, ani pek tezdä üüreneceymişlär gagauz dilini. Zor inanılêr, çünkü onnarın birkaçı geçteki Başkankanın İspolkomunda işledilär hem artık adadıydılar bunu yapmaa. Ama, nicä var bir laf “Padişah (Başkanka) gitti, eşek tä (Gaguziya) may öldü”. Şindi dä bizä hemen deerlär: Ölmä eşeciim, gagauz dilini üürenecez.
Gagauziya İspolkomuna kandidatlar, Halk Topluşu komisiyalardan geçärkänä, GHTnın reglament, atanmak hem da deputatların imunitetınnan etikası komisiyasının oturuşunda, bu komisiyanın başı Mihail JELEZOGLU açıkladı, ani “Lingvistika komisiyanın kararına görä gagauz dilini bilmeerlär Gagauziya İspolkomuna kandidatlar – Pavel VEREJANU, Yuriy KUZNEȚOV, Tatyana DOYÇEVA, Maksim MİHAYLÜK, Boris GOLOVİN, Marina SEMÖNOVA (Lingvistika komisiyanın orutuşuna gelmedi), Sergey AVTUTOV hem Valeriy ROTAR”.
Şindi, Gagauziya Halk Topluşu oturuşunda, ani olacek Harman ayın (avgust) 4-dä, Gagauziya İspolkomuna kandidatlar temelleştirilsin lääzım. Ama Gagauziya zakonnarına görä gagauz dilini bilmeyän kişilär yok nicä Gagauziya İspolkomun azaları olsunnar.
İş zor. Ama Gagauziya Halk Topluşu içindä çok kırmızı yılan var, ani, erceezlerini korumaa deyni, yıllar boyunca partiyadan partiyaya spetlän gezdilär. Şindi da, Moldovada zapa altında bulunan “Şor” politika partiyasına sızmaa hem inan adam olmaa savaşêrlar. Da, onnar var nicä, Halk Topluşun ensesinä sarılıp, onu kıvratmaa savaşsınnar. Kıvradabileceklär mi acaba? Bunu Harman ayın (avgust) 4-dä görecez.
Bunu bileräk tä, eni seçilän Başkankanın insannarı, taa doorusu, Moldovada zapa altında bulunan “Şor” politika partiyasının başından İlan ŞORdan gelän emirlerlerindä olan tayfa, Halk Topluşunu zorlamaa, kimileri deer deputatları düümää dä, hazır.
Büün belli olacek: zorlamalara karşı Gagauziya Halk Topluşu bu zorlamalara karşı dayanacek mı, verimeyecek mi?
Patret: nokta.md
