Caltay gimnaziyanın iştä hem ustalıkta pedagogu Evdokiya Petrovna PETKOVİÇ gagauzların eski adetlerini, ustalıklarını hem işlerini, unutturamaa deyni, durmamayca gimnaziyanın üürencilerinnän bu işleri yapêr. Bu kerä dä kerpiç dökmesini onnara üüretti.
Kerpiç dökmesi için hepsi tertiplär (kazmalar, küreklär, diirennär, kaluplar) taa ilerdän hazırlandı. Sora da, adetin sırasını bozmamaa deyni, taa Komrattan Caltaya bir beygir getirildi.
Kerpiç dökmä sırası evellär birkaç gün sürtürdü: lääzımdı erini hazırlamaa, sarı toprak, su hem saman getirmää, ilersi günü da topraa islamaa hem karmaa. Sora da, insannarı meciyä buyur edip, ertesi günü samannı kerpiç dökülärdi.
Kerpiç dökmesi da ölä olardı: çamuru kesip, diirennän hem küreklän onu targalara ükledärdilär da targalarlan kaluplara dökärdilär. Kaluplar sa kuru saman sepelenmiş er üstünä koyulardılar hem parçaylan islanırdılar. Kalıplar içinä dökülän çamur ellän erleştrildiktän sora da, o kalupları iki kişi yavaşıcık kaldırırdı da yanasşık erä koyardı.
Kerpiç dökülmesi şen, ama aar iş olduu için, meciclerä başta ellişär gram rakı dökülürdü, sora da ikidä-birdä birär filcan şarap sürülürdü. Belliki, imäk ta koyulurdu: kuzu borcu hem kartofi mancasınnan kaurmacık.
Akademik Todur ZANET
