Kär bölä neet kullandı Anna STAMATI – angliyca dili üürediciykası, açan istedi tanıştırmaa üürencileri gazetalatın hem jurnalların içindikilerinnän, onnarı çıkarmaa deyni çalışannarınnan hem taa başka meraklıklarlan, angıları ilgili gazeteların hem jurnalların tiparlanmasınnan.
Bu olay geçeceydi taa kolay, ama bizim üürencilär hem üüredici kolay yol ayırmêêrlar!
Uşaklar hepsi bu bilgileri kazandılar tanışarkan gagauz dilindä “Ana sözü”, “Hakikatın sesi” gazetalarlan hem “Sabaa yıldızı”, “Gagauz yazıcılar birlii”, “Guguşçuk», “Güneşçik”, “Gagauz dili hem literaturası” jurnallarlan.
Helal üürediciyä ,helal üürenicilerä, helal şkolanın önderciliinä!
Pek kanaatım, ani birleşik işimiz yardım eder uşaklara korumaa gagauzluumuzu!
Bundan kaarä bizim Odesa bölgesinin gagauz kultura merkezinda pek gözäl hem faydalı bakıldı Halkararası Ana Dili Günü dä. Bibliotekamızda buluştuk Kurçu (Vinogradovka) küüyün Aleksandr BANEVın adına lițeyin üürencilerinnän, öndercilerinnän, kultura insanı Tina Petrovna SÜRMÄylän.
Bu buluşmada uşaklar sevgiylän annattılar peetleri, cuvap verdilär bilmeycelerä, söledilär söleyişleri,çözdülär bulmacaları.
Siiredip “Ana dili – Halkın canı” prezentațiyayı, annadılar angı erdä buluner, Dünnä dillerin arasında, bizim gagauz dilimiz!
Ne esaba aldık – bizim uşaklar isteerlär gagauzça lafetmää! Ana-bobalar, alın bu olayı, nicä bir ii duygu, LAFEDİN uşaklarlan gagauzça!
Olga Kulaksız, Odesa bölgesinin gagauz kultura merkezin direktoru
