Canavar ayın 8-dä “Teleradio-Moldova” cümne kompaniyasında lääzımdı olsun Canavar ayın (oktäbri) 20-dä Moldova olacek Prezidentın seçimnerinnän ilgili prezidentlää kandidatların debataları. Studiyaya çaarıldı 3 kandidat: “Çalışmak hem Birlik” (PAS) politika partiyasından kandidat Maya SANDU, Moldovanın Soțialistlär politika partiyasından (“Partidul Socialiştilor din Republica Moldova”) kandidat Aleksandr STOYANOGLU hem “Bizim Partiya” (“Partidul Nostru”) politika partiyasından kandidat Renato USATIY.
Annaşmaya görä bu olaceydı Maya SANDUnun Aleksandr STOYANOGLUlan hem Renato USATIYlan debataları. Ama “Çalışmak hem Birlik” (PAS) politika partiyasından prezidentlää kandidat Maya SANDU studiyaya gelmedi.
Debataları götürän spiker dedi: “Bu avşam bizim studiyamıza geldilär Moldovanın Soțialistlär politika partiyasından prezidentlää kandidat Aleksandr STOYANOGLU hem “Bizim Partiya” politika partiyasından prezidentlää kandidat Renato USATIY. “Çalışmak hem Birlik” (PAS) politika partiyasından prezidentlää kandidat Maya SANDU kullanmadı bizim teklifimizi da studiyaya gelmedi”.
Prezidentlää kandidat Aleksandr STOYANOGLU açıkladı, ani “kuvedin hem opozițiya arasında debatalar demokratiyanın önemli elementıdır, ama Maya SANDUnun burada yok olmasınnan soruşlara hem kabaat bulmalara yok kim cuvap etsin”. Ekleyip, ani onda “Renato USATIYa soruş yok”, bu üzerä Aleksandr STOYANOGLU çıktı studiyadan.
Renato USATIY da dedi, ani onda da “Aleksandr STOYANOGLUya soruş yok”, ama studiyadan çıkmadı, da götürücün soruşlarına cuvap etti.
Var nicä demää, ani seçimnerä karşı debatalar uurunda bu ilk skandal. Esaba alarak, ani “Teleradio-Moldova” cümne kompaniyası bildirdi, ki neetindä var prezidentlää 11 kandidatlan hem referendumda pay alacek 15 partiyanın temsilcilerinnän 9 raund debata yapmaa, bu diil tek hem son skandal.
“Teleradio-Moldova” cümne kompaniyası açıkladı, ani debatalar romın dilindä geçeceklär, ama onnarın son minudunda katılannar var nicä azınnıklara hem sayıdan az milletlerä onnarın dilindä danışsınnar.
