Kasım ayın 3-dä Moldova Prezidentın seçimnerinin II-ci turu oldu, neredä iki kandidat, Maya SANDU (“Çalışmak hem Birlik” (PAS) politika partiyasından) hem Aleksandr STOYANOGLU (Moldovanın Soțialistlär politika partiyasından), başa-baş geldilär. Bu turun sonuçlarına görä Moldova Respublikasının Prezidentı Maya SANDU ayırıldı.
Dooru, Moldova Merkez Seçim Komisyasının (MSK) açıklamasına görä, bu turda, hepsi katılan seçimcilerin arasından, Maya SANDU – 55,35 % (930 238 kişinin oylarını) aldı. Onun karşı kandidatı Aleksandr STOYANOGLU sa – 44,65 % (750 370 kişinin oylarını) aldı.
Bu açıklamalara karşı bircii bişey koymêêr, ama bu işin bir incelii var hem, bu sıralar yazılırkana, Moldova Respublikasının Prezidentı seçimnerin sonucu Sudun tarafından taa tanınmadı hem bu işin bir incelik var.
Ne türlü geçti Moldova Prezidentın 2024-cü yılın seçimneri sadä istämeyennär yazmadı. Kimileri metetti, kimileri maana buldu, kimileri kötüledi. Ama biz aalemin ipinnän kolverilmeyecez. Bu uurda sade birkaç țifra hem örnek getirecez, kalanını sizin kantarlamanıza brakêrız.
Seçimnerin kartasına toptan bakarak göreriz, ani Maya SANDU prezidentlik seçimneri Moldova içindä tarattı hem o seçimneri Aleksandr STOYANOGLU kazandı.
Bakın, açan Moldova içindä hepsi seçim protokolları sayıldı, ortaya çıktı, ani burada, Moldova Merkez Seçim Komisyasının (MSK) açıklamasına görä, seçimnerdä pay alan 1 milion 353 bin insan oylarını bölä verdi: Aleksandr STOYANOGLU için – 51.19% (692 533 oy), Maya SANDU için – 48.81% (660 226 oy). Ama sora ortada peydalandı aşırıdan, Evropa hem Amerika diaspora dedikleri, 328 855 kişinin oyları (sayıda poştadan oy yollayannarı da), angılarının 83%-ti oylarını Maya SANDUya vermişlär, da durum diişti.
Bir da esaba alarsak, ani Rusiyada olan Moldova vatandaşlarına oylarını kullanmak için herbir sürtülemäk yapıldı: yaklaşık 350 bin kişi için iki seçim bölümü açıldı hem oraya sade 10 bin bületen yollandı. Hem da esaba alarsak onu da, ani I-ci turda Maya SANDUya karşı verilän hem taa çok Pridnestrovye seçimcileri için olan 4 seçim bölümü “mina koyulmuş beterinä” hem Pridnestrovyedan gelän seçimcilerin geçiş köprüsü bilinmiyan kişilerin tarafından “mina koyulma sebepinnän” II-ci turda kapandılar, seçimnerin kartasının resimi başka renklärlän oynamaa başlêêr.
Bölecä, bu fasıl renklär oynaması şafkında Moldova içindä taradıp, Maya SANDU, Evropa hem Amerika diasporanın yardımınnan, prezident oldu.
