Küçük ayın (fevral) 14-16 günnerindä Kişinevdakı “MoldExpo” merkezindä geçti XXVIII-ci “Tourism & Travel Expo – 2025” Halklararası maasuz sergisi, angısını hazırladılar Moldova kultura ministerlii, Milli turizma bürosu, “MoldExpo” Halklararası sergi merkezi hem dä onnara arka oldular kimi Moldova rayonnarın hem Gagauziyanın erindeki kuvetlär organnarı.
“Tourism & Travel Expo – 2025” Halklararası sergisinin çerçevesindä yapıldı maasuz turistika uurunnan ilgili pek gözäl bir kultura sırası – “Hora: adetlär aracılıınnan birleşin” yarışmak Festivali, neredä, başka 13 erdän kaarä, pay aldılar Gagauziyadan artistlär dä. Onnarın arasında vardılar Kongaz Kultura Evi hem Kongazdan “Cızdırık” hem Komrattan “Bürüncük” teatru kolektivları, Baş küüyü (Kirsova) muzeyi, Gagauziyanın Semön POMETKO adına “Düz Ava” türkü hem oyun halk ansamblisi, Ferapontyevka küüyün “Juravuşka” hem Komrattan “Kadınca” ansamblileri.
Festivalin ana temasıydı – “Soba aazında” stendları hazırlamaa hem bu çerçevedä kendi turistika programalarını hem halk oyunnarını göstermää.
Gagauziyadan hepsi kolektivların gösterileri büüledi sergiyä gelän insannarı, siiredicileri hem Festivalin jürisini. Ama en şaşılacek iş oldu, açan “Düz Ava” türkü hem oyun halk ansamblisi gösterdi “Gagauz düün oyunu”nu. Bu oyunun büüleyici energetikasınannan dä bütün Gagauziya “Hora: adetlär aracılıınnan birleşin” yarışmak Festivalindä II-ci eri kazandı.
Kutluca olsun hem buyurun Gagauziyaya!
