Küçük ayın (fevral) 19-da Komrat Kutura Evindä yapıldı prezentațiya TİKA yardımınnan tiparlanan Gagauz dilindä baş nasaatçıykası İvanna Dimitrievna ZANETin kanadı altında, Akademik Todur ZANETin tarafından düzennenän hem eni çıkan 6 tomnuk “Büük Gagauzça-Rusça Sözlük” yaratmaya. Bu prezentațiyayı ortak hazırladılar Gagauziyanın kultura hem dä üüredicilik Upravleniyaları hem onnarın käämil zaametçileri.
“Büük Gagauzça-Rusça Sözlük” yaratmasının prezentațiyası başladı Todur ZANETin “Atılma dilindän, Halkım!” peetindän, angısını pek duygulu hem candan okudu Kıpçak küüyün lițeyinin 3-cü klasta üürencisi Nikita KOLİOGLU.
Bu önemni hem zengin yaratmanın prezentațiyaya katıldılar hem orada kutlama sözlerini tuttular Gagauziya Başkankası Evgeniya GUȚUL, Gagauziya Halk Topluşun Başı Dimitriy KONSTANTİNOV, Türkiye Respublikasının Komrat Başkonsulu Adnan HAYAL, Gagauziya kultura upravleniyasının baş zaametçiykası Anna POMETKO, Avdarma uşak başçasının gagauz dilindä terbiediciykası Viktoriya GARGALIK, Ütülü küüyün S. Ekonomov adına lițeyin gagauz dilindä hem literaturasında üürediciykası Anna UZUN.
Bundan kaarä 6 tomnuk “Büük Gagauzça-Rusça Sözlük” yaratmanın üzerindä çalışmalar için annattılar Sözlüün düzeldicisi Natalya KİVEL, “Pontos” basım evin direktoru Marçela MARDARE hem, belliki, Sözlüün avtoru Akademik Todur ZANET.
Kendi sözündä Akademik Todur ZANET şükür etti hepsi kuruluşlara hem insannara, kim hazırladı hem bölä gözäl geçirdi bu prezentațiyayı hem hepsinä, kim saymadı zaametini dä geldi burayı da tatlı söz söledi 6 tomnuk “Büük Gagauzça-Rusça Sözlük” için hem onu dünneyä çıkarması için.
Esaba alarak dünneydä eşi olmayan hem Gagauzluu, Gagauz kulturasını, folklorunu hem Gagauz dilini koruyan hem onnarın derinniini ortaya koyan bu kulturalı hazinesinin – 6 tomnuk “Büük Gagauzça-Rusça Sözlük”ün – önemni olduunu Gagauziya Başkankası Evgeniya GUȚUL, prezentațiya sırasında, ödülledi bu işä aarlıı koyan insannarı da kendi kararınnan onnara verdi:
“Mihail Çakir” ordenını – 6 tomnuk “Büük Gagauzça-Rusça Sözlük” yaratmasını hazırlayan Akademik Todur ZANETä
“Mihail Çakir” ordenını – 6 tomnuk “Büük Gagauzça-Rusça Sözlük” yaratmanın Gagauz dilindä baş nasaatçıykasına İvanna Dimitrievna ZANETä;
“Gagauziya (Gagauz Yeri) – 30!” medalisini – “Büük Gagauzça-Rusça Sözlük” yaratmanın düzeldiciykasına Natalya KİVELä;
“Gagauziya Başkanın hem Halk Topluşun” Gramotasını – “Büük Gagauzça-Rusça Sözlük” yaratmayı basıma hazırlayan “Pontos” basım evin direktoruna Marçela MARDAREya.
Ayrıca, Gagauziya kultura Upravleniyası verdi “Şükür Belgelerini” Pontos” basım evin zaametçiykasına hem Sözlüün mizanpajını hem kabının dizaynasını yapan Marina DİMİTRİUya hem dä “Balacron” tipografiyasının direktoruna Dumitru MUNTEANUya.
“Büük Gagauzça-Rusça Sözlük” yaratmasının prezentațiyası başarıldı Gagauziyanın ofițial olmayan “Yaşa, Halkım!” gimnasınnan (laflar – Todur ZANET, muzıka – İlya FİLEV), angısını çaldılar Gagauziyanın anılmış artistkası Tatyana MİTİOGLU hem artistı Andrey İVANOV.
Akademik Todur ZANETin eni çıkan 6 tomnuk “Büük Gagauzça-Rusça Sözlük” yaratmasının prezentațiyasında pay aldılar hem, baaşış olarak, birär takım Sözlük kablettilär gagauz dili hem literaturası üüredicileri, uşak başçaların terbiedicileri, Kultura Evlerin zaametçileri hem başka kultura insannarı. Ayrıca Sözlük takımnarı baaşlandılar Gagauziyanın küülerin, üüredicilik hem kultura kuruluşların bibliotekalarına da.
Gagauz dilindä baş nasaatçıykası İvanna Dimitrievna ZANETin kanadı altında, Akademik Todur ZANETin tarafından düzennenän bu 6 tomnuk “Büük Gagauzça-Rusça Sözlük” 56 000-dän zeedä lafı, termini hem deyimi içinä alan bir yaratma. Bundan kaarä onda toplu 3 000-nä yakın söleyiş, bilmecä, bulmaca, inanç, adet hem halk nışanı, angıları vererlär kolayını lafların maanalarını taa derindän açıklamaa, incelemää hem dooru kullanmalarını göstermää.
