Hederlez ayın 9-da (9 May) Gagauziyada binnärcä insan Enseyiş Günün 80 yıldönümünü kutladı hem II-ci Dünnää Cengindä faşist hem națist Germaniyayı enseyän kurtarıcı askerlerin pamätniklerinä hem anmak memoriallarına çiçeklän venoklar koydu hem da “Ölümsüz polk” örüyüşünä katıldı.
Örüyüşlerdä Gagauziya insannarın ellerindä II-ci Dünnää Cengi veterannarın patretleri, Enseyiş Bayraan kopiayaları hem Moldovaylan Gagauziya Bayrakları vardılar. Kimi insannar hem uşaklar ozamankı Kırmızı asker rubalarına giimniydilär.
Gagauziya kasabaların hem küülerin belli erlerindä toplanan hem memoriallara yollanan kolonnaların önnerindä duhovoy orkestralar gidärdi.
Memoriallarda kısa mitinglarda nasaat etmeklerdän hem bir minutluk susmak saygılarından sora, insannar çiçek hem venok koydular kurtarıcı askerlerin son dinnenmäk erlerinä.
Tamamnandı bu saygılı sıralar o Büük Enseyişä adanmış konțerlärlän.
