Harman ayın 8-dä Gagauziya Halk Topluşunda cümne görüşmelerinä çıkarıldı Gagauziyanın “Kultura için” Zakon proektı, angısını hazırladı Gagauziya kultura Upravleniyası hem onun zaametçileri.
Gagauziyanın “Kultura için” Zakon proektın cümne görüşmeleri yapıldı Gagauziya Halk Topluşun bilim, üüredicilik, kultura, dil hem dinnär Daymalı komisiya başı Dimitriy MANASTIRLI hem bu Daymalı komisiya başı yardımcısı Svetlana DÜVENCİ önderciliindä.
Zakon proektı için ön sözü söledi Gagauziya kultura Upravleniyasının başı Marina SEMÖNOVA, angısı annattı bu zakonun hazırlanması hem uuru için hem dä urguladı, ani “bu Zakon Gagauziyada sistemalı bir kultura politikası oluşturulmasının temeli olacek”.
Görüşmelerdä pay aldılar Gagauziya kultura zaametçileri, bibliotekacılar hem muzeycilär, teatrucular hem artistlär, yazıcılar hem bilim insannarı.
Konuylan ilgili hepsi nasaat edennär urguladılar, ani bu pek lääzımnı hem pişmiş bir zakondur hem onu nekadar tez lääzım kabletmää.
Bu cümne görüşmelerdä pay alan Akademik hem yazıcı Todur ZANET dedi: “Bu zakon çoktan lääzım. Zakon pek derin incelenmiş hem hazırlanmış. Biz lääzm kendimizi halk, millet sayalım. Biz diiliz azınnık hem diiliz etnika grupası. Beendim, ani Zakonda hererdä yazılı “gagauz halkı hem başka halklar”. Taa bir iş: açan deerlär “naționalnıe menşinstva” biz bunu diil lääzım kabledelim. Bunu deerlär te onnar, kim sayêr kendilerini yukarı kalkınma. Bu diil ölä. Herbir insan, herbir halk Allahın önündä birtakım yaradılmış. Yok nicä büün deyäsin: biz varız, kalanı da – böcek. Onun için danışêrım hepsinä: saymıyın kendinizi “naționalnıe menşinstva”, sayın kendinizi – bir büük halkın parçası. Bu zakonu nekadar tez kabletmää lääzım. Nekadar tez! Zere siz görersiniz, ani bizi yok ederlär, bizi silerlär. Lääzım etiştirelim temelä koymaa zakonnarı da bizi sökämesinnär temeldän. Kultura Upravleniyasına saa olun – büük iş yapmışınız! Halk Topluşuna da nekadar tez, ilk oturuşta bu Zakonu kabletmää da gitmää ileri, zere duyêrım ani tezdä taa büük hem taa çok işlär olacek”.
Çadırdakı “Dionis TANASOGLU” Gagauz-Rus Milli teatrusunun direktoru Mihail GAGAUZ da teklif etti, ani Gagauziya Halk Topluşu bu Zakonu ilk oturuşta iki okumakta birdän kabletsin.
