2025 yılın “Halklararası yaradıcı programalama SCRATCH olimpiadası”nda “Todur Zanet” lițeyin üürenciykası Nina GURAN kendi yaş uurunda I-ci eri aldı, brakıp arda Aljirdan, İndiyadan hem Malayziyadan katılannarı.
Nina GURAN bu olimpiada için hazırladı “Easy Learn” üüredicilik oyununu, angısı verer kolayını oyun uurunda uşaklar üürensinnär yannış angliyca laflarını. Kendisinä bu proekt uurunda yardımcı oldular informatikada üürediciykaları Vera Gavriilovna İKİZLİ hem Mariya Gavriilovna UZUN. Taa sora işä koşuldu angliyca dilindä üürediciyka Svetlana Dimitrievna DUŞKOVA da.
SCRATCH olimpiadası yapılêr 2017-ci yıldan beeri hem kendi kanadı altına toplêêr bütün dünnedän uşakları hem üürencileri. Gagauziyadan üürencilär bu olimpiadanın yarışmalarında 2022-ci yıldan beeri pay alêrlar.
Hep 2022-ci yıldan beeri SCRATCH olimpiadasında pay alêrlar Nina GURANın kardaşı Dimitriy hem kızkardaşı Viktoriya. Onnar da buyılkı “Halklararası yaradıcı programalama SCRATCH olimpiadası”nda kendilerini pek islää gösterdilär. 7-ci klasta üürenän Dimitriy GURAN hazırladı kosmosa virtual ekskursiyaların “Expedition to space” prektını da 235 proektın arasından 18-ci eri aldı. 8-ci klasta üürenän Viktoriya GURAN sa hazırladı “From farm to pie” oyununu, angısında kolaylık veriler fermada bereketi toplamaa hem, döşemä pişirip, iş eri kazanmaa. O da 200 proektın arasından 60-cı eri aldı.
Nicä görersiniz, GURAN aylesi țifra tehnologiyaları dünnesinä yaradıcı yaklaşmakta hem etkilenmektä haliz bir örnek oldu.
