2025-ci yılın Harman ayın (avgust) 19-da Komrat Kultura evindä Gagauz Respublikanın kurulmasının 35 yıldönümü kutlama sırası bakıldı.
Bu kutlama sıranın başında Gagauz Respublikasının kuran veterannar hem aktivistlär, Gagauziya İspolkomu azaları, Gagauziya Halk Topluşun deputatları, primarlar hem sıradan insannar Gagauziyanın “Şan Aleyası”na çiçek koydular.
Bundan sora, Komrat Kultura evindä oldu Gagauziya Halk Topluşun yortulu toplantısı, neredä, Moldova hem Gagauziya Gimnalarından sora, nasaat ettilär Gagauziya Halk Topluşun Başı Dimitriy KONSTANTİNOVA, Gagauziya İspolkomu Predsedatelin yardımcısı İlya UZUN, Gagauz Respublikasının kuran veterannar hem aktivistlär.
Nasaatlardan sora burada, Gagauz Respublikasının kurannara hem bu işlän ilgileri olmayan insannara, “Gagauziya (Gagauz Yeri) ordenı” verilmä yaamuru oldu.
Gagauz Respublikanın kurulmasının 35 yıldönümü kutlama sırası başarıldı Gagauziyanın Semön POMETKO adına “Düz Ava” türkü hem oyun halk ansamblisinin konțertinnän.
Aklınıza getireriz, ani 35 yıl geeri, 1990-cı yılın Harman ayın (avgust) 19-da Gagauz Halkın Üstolan Kongresindä alındı karar Gagauz Respublikasını kurmaa hem o Kongresä ayırılan 450 deputat, bir korkusuz, bunu dünneyä bildirdilär. Bu oldu ozaman, açan Moldova Respublikası kendi baamsızlıını taa kazanmadıydı (Moldova bunu yaptı bir yıdan sora, açan SSRB daaldı).
Gagauz Halkın Üstolan Kongresinä ayırılan deputatlar ilktän, 1990-cı yılın Orak ayın (iyül) 22-dä, 411 oylan Gagauz Milli Gimnasını (laflar – Todur ZANET, muzıka – Mihail KOLSA), Gagauz Milli Bayraanı hem Gerbı kablettilär.
Herliim dört yıldan sora, 1994-cü yılda, Gagauziya (Gaguz Yeri) avtonomiyamısına kayıl olan satılan eriflär, Gagauz Respublikasını satmaydılar bu Respublika büün dä yaşayaceydı. Şindi sä, o avtonomiyamızın sökülmesinnän, herbir devletlii kaybederiz.
