Kırım ayın 22-dä Kongaz küüyün Kultura evindä açıldı 25 patrettän oluşan “Halkımnan barabar” incäzanaatlı patret sergi, angısında sergilendi genç patretçiykanın, Gagauziya kultura Upravleniyası tarafından yapılan “Kadrada zaman” patret yarışmasının “Grand-pri” ödülünün saabisiykasının, kongazlıykanın Zinaida KOVALÖVAnın incäzanaatlı patretleri. Bu sergi hazırlandı Kongaz küüyün Kultura evinnän ortak çalışmalarda.
25 patrettän oluşan “Halkımnan barabar” incäzanaatlı patret sergisinin açılış sırasında söz tuttular Kongaz küüyün Kultura evin Matrona HRİSTEVA, serginin avtoru Zinaida KOVALÖVA, Kongazın primarı Mihail ESİR, Gagauziyanın kultura Upravleniyasının başı Marina SEMÖNOVA, Akademik Todur ZANET hem t.b.
Matrona HRİSTEVA: “Pek sevineriz, ani büün önünüzä çıkarılan bu gözäl serginin hazırlanmasında bizim katkımız da var, çünkü Zinaida KOVALÖVAnın patretleri – bu kulturamızı, adetlerimizi hem sıralarımızı annadan yaratmalar hem onnarın bir payı”.
Zinaida KOVALÖVA, serginin avtoru: “Bu benim için diil salt bir sergi. Bu – benim ömürümün benim uşaklıımın, benim akılımın bir parçacıı. Bän duudum burada, Kongazda. Bu er, neredä bän büüdüm, neredä üürendim sevmää insannarı, şafkı, evi. Bu patretlär hepsi buradan duumalı. Gagauz kulturası bana deyni oldu nesä taa büük. Bu diil sadecä tema. Bu – o, neyi bän isteerim büün göstermää, korumaa, paylaşmaa”.
Marina SEMÖNOVA: “Okadar duygulu, derin maanalı, dalgalı, gözäl bir sergi. Etlerim tikennedi – okadar gözäl! Saa olsun Zinaida KOVALÖVA, zerä belli, ani burada diil bir günün işi, diil bir yılın da”.
Mihail ESİR: “Pek sevinerim, ani bizim küüdä var bölä pek marifetli insannar, angıları saymêêr zaametini da bakêr bizim istoriyamızı, bizim küüyün insannarını andırêr çok yıllardan sora”.
Todur ZANET: “Zinaida KOVALÖVAnın herbir patredi şiralı hem gözäl. Zinaida KOVALÖVA – bu bir poet, zerä poeziya diil salt yazılarda, poeziya olêr yaratmakta da. Bän nekadar gördüm Canabisinin patretlerini – hepsindä poeziya! Bir peeti yok nicä yazasın, herliim canın yanmazsaydı. Siz bakêrsınız patredä da görersiniz, ani o patredi yapmaa deyni, bu insanın canı yanmış hem yanêr”.
Serginin patretlär üstündän kiyat perdelerini kaldırmaa kolaylıı verildi Kongazın primarı Mihail ESİRä hem Akademik Todur ZANETä, nedän sora siiredicilerin önündä peydalandı Zinaida KOVALÖVAnın büülü incäzanaatlı patret dünnäsı hem bu patretledä daymalara kalan insannar hem o insannarın ömür kıpımnarı.
“Halkımnan barabar” serginin açılışında pay aldılar Zinaida KOVALÖVAnın yakınnarı hem dostları, Kongaz küüyün Kultura evin zaametçileri, kultura hem cümne insannarı, bibliotekacılar, Gagauziyanın kultura Upravleniyasının zaametçileri, Kongaz küüyün Todur Zanet adına teoretik lițeyin üürencileri hem üüredicileri, sıradan insannar.
