İki aftanın içindä dünnedä Evropa Birliinnän ilgili iki önemni olay oldu. Birindä – İslandiya açıkladı, ani Evropa Birliinä girmäk için enidän görüşmelerä girmää karşı. Öbüründä dä – Şotlandiya, Uels hem Poyras İrlandiya açıkladılar, ani geleceklerini, Büük Britaniyadan ayırılıp, Evropa Birliindä görerlär.
İSLANDİYA EVROPA BİRLİİNÄ GİRMÄÄ KARŞI
2026-cı yılın Harman ayın (avgust) 30-da İslandiya devletindä olan referendumda insannar Evropa Birliinä katılmak için enidän görüşmelerä girmää karşı oy verdilär.
Açıklanan belgilerä görä, Evropa Birliinä (EB) girmäk için enidän görüşmelerä girmää referendumunda pay aldı 270 bin insan (İslandiyada, uşaklarlan bilä, 404 bin insan yaşêêr). Onnarın 52,8% karşı oy kullandılar, 47,20% kayıllık oyu verdilär.
EBya girmää deyni İslandiya 2009-cu yılda baş urdu, ama 2013-cü yılda bu işi durguttu.
Bakmadaan ona, ani İslandiya EB azası diil, o Şengen hem Evropa ekonomika zonalarında bulunêr, ne verer kolayını onun vatandaşları EB devletlerindä bol-bol gezsinnär hem burada mallarını raat satsınnar.
BÜÜK BRİTANİYA DAALACEK MI?
2026-cı yılın Ceviz ayın (sentäbri) 14-dä Şotlandiya, Uels hem Poyras İrlandiya devletlerin premyer-ministruları imzaladılar Büük Britaniya devletindän ayırılmak için ortak bir Memorandum.
Bu Memoranduma görä, Şotlandiya, Uels hem Poyras İrlandiya kendilerinä hak aldılar baamsızlık için referendum yapmaa hem kendibaşına devletlär olmaa.
Ayırıca Memorandumda yazılı: Şotlandiya, Uels hem Poyras İrlandiya kendi geleceklerini Evropa Birliindä görerlär.
