Ceviz ayın 20-dä Kişinevda büük tantanalıklan, şamatalıklan hem gürültüylän geçti “Unitatea de diversitate” (“Çeşitliktä birlik”) adlı XXV-ci Respublika Etnofestivali, angısında pay aldılar Moldovada yaşayan etnosların 19 etnokultura cümnelerin temsilcileri.
“Ştefan şel Mare” (Büük Ştefan) pamätniinä çiçek koymaktan hem burada teatrulu sırasından başlayan bu XXV-ci Respublika Etnofestivali sora park içindä kurulan milli aularda hem fantanın dolayında kurulan sțenada ilerledi.
Gagauz milletini (diil etnosunu!!!) XXV-ci Respublika Etnofestivalindä temsil etti Gagauzya (Gagauz Eri) kultura Upravleniyasının kurduu gagauz aulu hem gagauz kultura insannarı, angıları büük cömertliklän gösterdilär gagauz milletin sıcaklıını, tanıştırdılar feztivalä gelän insannarı gagauzların imeklerinnän, adetlerinnän, literturasınnan hem sıralarınnan.
Gagauzyanın aulundan kendi oyunnarınnan hem sıralarınnan ortalıı hem gelän musaafirleri şennendirärdilär Kongazdan “Altın çöşmä” örnekli uşak oyun ansamblisi hem Beşalmadan “Sedef” ansamblisi.
Bu festivaldä en islää taraftan gagauzları göztermää deyni, başta Gagauziya kultura Upravleniyasının başı Marina SEMÖNOVA olarak, pek büük izmetlär koydular bu Upravleniyanın zaametçileri.
