Gagauziya Başkanın adından 27.04.2026 günü imzalanan №19 Kararınnan Gagauziya Radio hem Televideniye (GRT) cümne Kompaniyasının korespondentına, Gagauziyanın kıymetli jurnalistkasına Polina BARBOVAya Gagauziyanın kultura uurunda en üüsek nışanı “Mihail Çakir” ordenı verildi.
Nicä yazılı Polina BARBOVAya “Mihail Çakir” ordenını vermä için Kararda, Canabisinä bu orden verildi “Mas-mediya uurunda çok yıllar faydalı çalışmaları, üüsek ustalıı, kendi işinä baalılıı, Gagauziya ATBsında baamsız jurnalistikanın ilerletmesindä büük katkıları, gagauz dilin yaygınnaştırılması hem gagauz halkın milli varlıını koruması, Gagauz avtonumiyasının temelleştirilmesindä hem kurulmasında pay alması için”.
Yanılmayacam, herliim sölärsäm, ani GRT cümne Kompaniyasının korespondentı, Gagauziyanın kıymetli jurnalistkası Polina BARBOVA kultura uurunda bu en üüsek nışanı – “Mihail Çakir” ordenını – çok yıllar jurnalistika uurunda durmamayca çalışmalarınnan hak etti. Çünkü gün-gündän, yıllar boyunca, kuvedini koydu ona, ani Gagauziyayı, gagauzları hem gagauzluu dünneyä tanıtmaa hem GRTda gagauz dilini yaşatmaa.
Pek islää bilerim, ani Canabisinin yaratmak yolu jurnalistikanın türlü dallarından geçti: videosüjetlardan reportajlara, jurnalistika aaraştırmalarından dokumental yayınnara, kısa intervyulardan derin hem akıllı studiya programalarına.
GRTnın hepsi siiredicileri dä bilerlär hem büük havezlän siirederlär Polina BARBOVAnın başarılıylan hazırladıı becerikli kolverimneri – “Din ruhu”, “Gagauziya gün-gündän”, “Maasuz reportaj”. Büük meraklıklan insannar siirederlär onun tarafından götürülän “Haberlär” programalarını dä.
Nicä açıklêêr kendisi Polina BARBOVA, onun ömür uurlararı: dooru hem açık olmaa, durmamayca gitmää ileri, herzaman insan kalmaa hem da nekadar çok hem faydalı işlär yapmaa kendi halkı için hem dä açık candan ona işlemää. Bu üzerä dä onun hazırladıı hepsi kolverimnär ölä derin hem bereketli, çünkü Canabisi onara bütün kuvedini koyêr hem kendi can sıcaklıını verer.
Kutlêêrım Gagauziyanın kıymetli jurnalistkasını Polina BARBOVAyı bölä üüsek uurda ödüllän! Sevineriz, ani Canabisinä, sıradan insannardan kaarä, Gagauziyanın büükleri dä, onun derin çalışmalarını tanıyarak, bukadar saygı hem hatır güttülär.
Polina Dimitrievna, Saalık Allaa versin!
Akademik Todur ZANET
