2026-cı yılın Hederlez ayın 9-da (9 May) Moldovada genä iki yortu birdän bakıldı: II-ci Dünnä Cengindä faşistlän națist Germaniyadan dünneyi kurtarmak cengindä Enseyiş Günün 81-ci yıldönümü hem da bu günä uydurulan Evropa Günü.
Hederlez ayın 9-da, çin sabaalän, taa insannar sokaklarda pek görünmeyän zaman, Moldova Prezidentı Maya SANDU, Moldova Parlamentın spikerı İgor GROSU, Moldova Premyer-ministrusu Alexandru MUNTEANU, Moldova minisruları hem kuvet kuruşların başkannarı, II-ci dünnä cengindä ölän askelerin anması için, Kişinev “Sonsuzluk” (“Eternitate”) Memorial Kompleksında kurulan anmak pamätnää, askerlerin adları yazılı plitalara hem “Sonsuz ateş”in yanına çiçek koydular.
Bununnan Moldovada kuvettä bulunannarın II-ci dünnä cengindä Enseyiş Günün bakılması bitti da başladı Evropa Günün kutlanılması, angısının ana sıraları Kişinevun Büük Milli Toplantısı Meydanında yapıldı, neredä kuruluydu Evropa Birliinä girän devletlerin tanıtmak çadırları hem nereyi toplanmıştı birkaç üz insan.
Onnar, kimä deyni Hederlez ayın 9-da (9 May) II-ci Dünnää Cengindä faşistlän națist Germaniyadan dünneyi kurtarmak cengindä Enseyiş Günüydü, binnärcä insannardan kurulan kolonalarlan gittilär II-ci dünnä cengindä ölän askelerin memoriallarına hem pamätniklerä çiçeklärlän venoklar koydular, susmaklan hem saygıylan andılar kurtarıcı askerleri. Bu oldu hem Kişinevda, hem Gagauziyada hem dä Moldovanın başka erlerindä dä.
Gagauziyanın baş kasabasında Komratta, başta Gagauziya İspolkomu Predsedatelin yardımcısı İlya UZUN hem Halk Topluşun geçici Başı Nikolay ORMANCI olarak, binnän insandan oluşan kolonna geldi buradakı Asker şanı Memorialına, nereyi bir mitingtan sora venoklar hem çiçeklär koyuldu. Avşamneyin dä bir konțert yapıldı.
