Avtonomiyazda “Üüsek marifetli uşaklar” programasının ömürä geçirilmesi çerçevesindä Kirez ayın (iyün) 10-da, Gagauziya üüredicilik Upravleniyasının zaametinnän, düzennendi hem yapıldı “Hepsindän islää!” uşak talantlarının yortusu. Yortunun temel lozungu oldu – “Herbir uşak – hepsindän islää!”
Şennik, incäzanaat hem uşakların ihlamı atmosferasında geçän bu yortu bireri topladı şkoladan öncä kuruluşlarından uşakları, onnarın analarını-bobalarını, üüredicilerini, terbiedicilerini hem sıranın musaafirlerini.
Yortulu selemnamalarlan hem masallar personajların danışmalarınnan açılan bu yortuda uşaklar gösterdilär türkü, muzıka, tanțlar, şahmata, gimnastika, güreş, taekvando, kikboksing hem başka uurlarda marifetlerini.
Bundan kaarä uşaklar gagauz dilindä literatura yaratmaklarını okudular, türlü dillerdä türkü çaldılar hem teatru sțenkaları gösterdilär.
“Hepsindän islää!” uşak talantlarının yortusunda pay alan uşaklara hepsinä diplomnar, anmak medalileri hem tatlılık baaşışları verildi.
