Kirez ayın 23-26 günnerindä Uzbekistan Respublikasının Namangan kasabasında geçti “III-cü Makom incäzanaatında Halklararası Forumu”, neredä pay aldılar 83 devlettän 250-ya yakın kultura, incäzanaat hem bilim insannarı. Forum düzennendi Uzbekistan Respublikasının kultura ministerlii, UNESCO, İSESCO (Üüredicilik, bilim hem kultura uurunda İslam kuruluşu) hem TÜRKSOY kanatları altında.
“III-cü Makom incäzanaatında Halklararası Forumu”n açılışını yaptı Uzbekistan Respublikasının Prezidentı Şavkat MİRZİÖEV. Nedän sora söz aldılar UNESCO hem İSESCO temsilcileri. Festivalin tantanalı açılışı ilerledi büük hem gözäl bir konțertlan hem başarıldı şaşılacek feyerverklän.
“III-cü Makom incäzanaatında Halklararası Forumu” çerçevesindä Namanganda yapıldı “Dou makamatın eni tendențiyaları: adetlerin hem inovațiyaların uygunnuu” bilim-praktika konferențiyası. Bu konferențiyada pay alan hem doklad okuyan Amerika, Avstriya, Azerbaycan, Belarusiya, Bosniya-Gerțegovina, Bulgariya, Büük Britaniya, Franțiya, Golandiya, İndiya, İran, Kanada, Kazahstan, Latviya, Litva, Malaziya, Mongoliya, Nepal, Pakistan, Rusiya, Şvețiya, Tadjikistan, Turkmenistan, Türkiye, Uzbekistan, Üülen Koreya hem Vengriya devletlerindän bilim adamnarın arasında, Moldovayı hem gagauzları temsil ederäk, burada kendi dokladını “Gagauz folklorunda literatura makamın örnää olan şalvir hem dolandırıcı Kösenin obrazı” okudu Akademik Todur ZANET.
Bundan kaarä Akademik Todur ZANET baaşladı bu konferențiyayı hazırlayan Yunus Racabi adına milli muzıka zanaatı institutun rektoruna İldar ŞERMANOVA kendi tarafından hazırlanan hem TİKA yardımınnan tiparlanan 6 tomnuk “Büük Gagauzça-Rusça Sözlük” takımını.
Forum zamanı unudulmadı kultura programası da. Ona görä ekskusiyalar yapıldı “Evelki Axsikent kasabası” gök altında açık muzeyä, Sırdarya derisinin kenarına hem Namanganın “Zahiriddin Muhammad Bodur başçası”na (“Güllük parkı”), neredä taman geçmişti Halklararası çiçek festivali.
“III-cü Makom incäzanaatında Halklararası Forumu” başarıldı büük bir kapanışlan, neredä pay aldı Uzbekistan Respublikasının kultura ministerliin ministrusu Ozodbek NAZARBEKOV. Kapanışta Makom incäzanaatında ustalıını gösterän hem ödül kazanannar kutlanıldı.
