2026-cı yılın Kirez ayın (iyun) 23-dä 55-ci yıldönümünü kutladı anılmış gagauz kultura adamı, muzıkant hem kompozitor, tükücü hem türkülär avtoru, resimci hem skulptor, pedagog, Gagauziyanın kıymetli zaametçisi, Moldova Respublikasında “Maestru în Artă” Vitaliy MANJUL.
Vitaliy MANJULUNun yıldönümü kutlama sırası yapıldı Kirez ayın (iyun) 23-dä Gagauziyanın Regional resim Galereyasında, neredä kuruldu onun “Renklerin Melodiyası” akvarel resimneri sergisi hem nereyi, yubilärı kutlamak için, geldilär kultura insannarı, Canabisinin yakınnarı hem dostları.
Bu yortulu sırada yubilera can sıcaklıı kutluma sözlerinnän danıştılar Gagauziyanın Kultura upravleniyasının Başı Marina Semönovna SEMÖNOVA, Komrat kasbasının primarın yardımcısı Stepan KARA, “Saalık” AB başı Elena RUSU, resimci hem üüredici Grigoriy DEÇEV, Maestronun üürencisi, arhitektor Nikolay GARÇU hem başkaları.
Kutlama sırasında insannara tanıştırdılar Vitaliy MANJULun hep “Renklerin Melodiyası” adını taşıyan resim katalogunnan da, angısında toplu onun 103 akvarel resimi.
Eridir urgılamaa, ani, Vitaliy MANJULun 55-ci yıldönümü kutlamaları sırası çerçevesindä, Kirez ayın (iyun) 30-da Komrat kasabasının Kultura Evindä Canabisinin hep “Renklerin Melodiyası” adlı büük bir yaratma konțerti olacek.
Biz da, “Ana Sözü” redakțiyası olarak, kutlêêrız Canabini bu gözäl yıldönümünnän. Saalık hem uzun ömür sizä. Yaratmak yolunuz aydanıık olsun hem tıkanmasın!
