TİKA tarafından kurulma “Kalkınma Elçileri” programası çerçevesindä, Moldovaya gelän hem bu programayı temsil edän Türkiye gençleri beş gün içindä Gagauziyaylan tanıştılar hem burada olan kimi sıralara katıldılar. Onnarın arasında vardılar terbiedicilik hem üüredicilik, kultura hem soțiyal kuruluşlarınnan tanışmaklar.
Ölä, TİKA “Kalkınma Elçileri” programasını temsil edän Türkiye gençleri Çadır kasabasında pay aldılar üüredicilik yılın açılışın yortulu bir sırasında hem Çadır kasabasının zanaat uçilişesininnän tanıştılar. Uçilişçedä aşçılık işini denedilär hem kendi ellerinnä türlü tatlılıları yaptılar hem pişirdilär. Sora da o tatlıları, uşak başçalarına gidip, uşakları ikram ettilär.
Kalkınma Elçilerin gittikleri erlär oldular Kıpçak küüyü hem Komrat kasabası da.
Komratta programa pek büüktü. Kalkınma Elçileri tanıştılar Komrat Recep Tayyip ERDOĞAN adına ihtärlar Evinän, neredä yaşlıları ikram ettilär kendi ellerinnän yaptıkları imeklärlän.
Onnar tanıştılar Komrat Devlet Universitetınnan hem, TİKA tarafından 1998-ci yılda kurulan, Mustafa Kemal ATATÜRK bibliotekasınnan. Ayırı bir vizit yaptılar Komrat primariyasına, neredä primariyanın işinnän tanışmaktan kaarä, burayı gelän yoksul hem zor durumda bulunan insannara, yardım için, iyecek mallarınnan dolu kutular daatılar.
Bundan kaarä Kalkınma Elçileri Komrat Süleyman DEMİREL uşak başçasına uuradılar. Neredä uşaklara türk, gagauz hem moldovan milli tatlılıklarını ikram ettilär, TİKAnın hazırladıı çanta hem boyaları baaşladılar. Uşaklar, Kalkınma Elçilerinnän birliktä, Türkiyenin hem Moldovanın istoriyalı hem turist erlerini hem dä TİKAnın memelekettä yaptıı proektların resimnerini boyadılar.
Gagauziyaynın hem gagauzların istoriyasınnan hem kulturasınnan taa derindän tanışmak için, bir kultura programası olarak, Kalkınma Elçileri Beşalma küüyün istoriya hem etnografiya muzeyinnän tanıştılar.
