Moldovanın Merkez Seçim Komisiyası (MMSK) Ceviz ayın 1-dä aldı karar Gagauziya Başkanı seçimnerini Gagauziya Halk Topluşuna seçimnärlän bir gündä yapmaa – Kasım ayın 15-dä.
Bu karar Gagauziya Halk Topluşu (GHT) hem Gagauziyanın hepsi insannarı için ansızdan bir karar gibi oldu. Ama o ansızdan diildi, çünkü GHT iki kerä, kvorum olmadıı için, alamadı bölä bir kararı.
Yuristprudențiya tarafından MMSKnın Gagauziya Başkanı seçimneri için kararı dooru mu osa yannış mı bunu yuristlar kantarlasın. Çünkü Moldova tarafı deer, ani hepsi yapılêr Moldova Seçim Kodeksına geçennerdä yapılan diiştirmeklerär. Gagauziya tarafı sa sayêr, ani bu karar diil dooru, zerä “Gagauziya (Gagauz Yeri) özel hak statusu için” Konstituțiyalı Zakonuna görä, Gagauziya Başkanı seçimnerini GHT belertsin lääzım. Bölä sä, MMSKnın bu kararı yolunnan Başkanın seçimnerinä Moldova Gagauziyayı edektän götürer, sayêrlar Gagauziya İspolkomu hem Gagauziya Halk Topluşun öndercileri.
Moldovanın Merkez Seçim Komisiyası (MMSK) artık belertti, ani Moldovada olan 66 politika partiyasından hem politika kuruluşlarından Gagauziya Başkanı seçimnerindä var nicä pay alsın sade 37.
Bakmadaan ona, ani insan içindä Gagauziya kimi politikacıları bir taraftan Moldova hem Gagauziya arasında suları bulandırêr, öbür taraftan da o suda artık balık tutmaa başladılar. Büünkü günädän kendilerini Gagauziya taraftarı gösterän birkaç politika partiyası Gagauziya Başkanı seçimnerinä kandidatlarını artık açıkladı. Baamsız kandidatlar da bir tarafta kalmêêrlar.
MMSK belertti, ani Gagauziya Başkanı hem Gagauziya Halk Topluşuna seçimneri yapmaa deyni, devletin keseindän artık 13,6 milion ley para ayırdı.
