2015 yılın Gagauziya Başkan seçimneri istoriyaya vardı. Bölä hıstırıcı hem esapsız seçimnär Gagauziya görmedi taa. Ama esaba alarsak Moldova Parlamentına bıldırkı seçimneri, artık bişeycää yok ne şaşmaa: vardı kimdän örnek almaa. Bundan kaarä Evropa Birliin Büükelçileri da, Komrada gelip, kandidatları yola koydular.
Bakmadaan ona, ani şindiyädan, seçimneri taradan 9 kandidattan biricii sudlara danışmadı, lääzım kabletmää onu, ani o kandidatlar tanıdılar enseyenin taramasını.
İstoriyada kalacek bir çok önemli iş: açan Başkannaa bir kandidatın arkasında durêr Rusiya gibi dev devlet, onun baskı mehanizmasına, açık hem saklı kuvetlerinä, para kesesinä karşı biri koyamaz. Diil salt o 9 kandidat, ani seçimnerdä tarattılar, ama Moldova devleti da, ani bu hıstırıcı baskıya karşı bişey koyamadı hem koymaa istämeer.
Nicä da olsa sefaa ayırılan kandidat adadı, ani birleştirecek Gagauziyanın cümnesini hem insannarı. Bu gözä hem pek islää neet. Allaa versin, onun arkasında durannar eni Başkanı köstekleyämesinnär, payvantlayamasınnar.
Beni hepsindän pek azarladı o, ani taman seçim günündä, benim büüdüüm kliseyä, maamilä surat yardım için, eni seçilän Başkanın adamı 50 bin ley verdi. Bana kalsa, bu lekä hiç bir kerä silinmeyecek 2015-ci yılın Başkan seçimneri günündän hem o paralar haram olarak verildi, sayêrım.
İrina VLAHa da deerim: “Başkan seçilmeniz kutluca olsun hem geçteki başkan gibi kinni olmayınız!”
Todur ZANET
