Çiçek ayın 16-da Moldovada Türkiye Büükelçilii, Kişinevda çıfıtların “KEDEM” kultura dernään ortaklıınnan, “Turkish Passport” adlı dokumental kinoyu gösterdi. Kinonun gösterisi “KEDEM” binasında oldu.
“Turkish Passport” dokumental film annadêr II-ci dünnää cengi zamanında Evropada işleyän türk diplomatların çıfıtları genoţid zulumnuundan kurtarmaları için. Türk diplomatların girgin hem kahramanca zaametlerini annadan filmın siiretmesindä pay aldılar Moldovada bulunan diplomatlar, politika hem kultura insannarı, sıradan vatandaşlar. Bu gösteri maasuz hazırlandı İzrailin içindä hem dışında olan çıfıtların Yas gününä (Yom Hashoah).
Filmın önündä, Türkiye Büükelçisi Mehmet Selim KARTAL urguladı, ani Türk diplomatları kurtarardılar diil salt Türkiyenin çıfıtlarını, ama yabancı devletlerdän çıfıtları da, verip onnarına Türkiye pasportlarını.
“Zerä onnar çıkardılar konţentraţiya lagerlerindän hem orayı gidän poezdlardan çıfıtları, angılarına artık türk vatandaşlıı verildiidi, ne verdi kolayını onnarın cannarını kurtarmaa hem Türkiyeyä onnarı yollamaa.
Diplomatların çalışmaları açık tuttu umudun şafkını da verdi kolayını bu insannar Türkiyeyä yollansınnar, neredä onnar aydınıı buldular. Onnar kendi cannarını riska koydular, kurtarmaa deyni o insannarın cannarını, kim büük cellatlık kurbanı olduydu”,- urguladı büükelçi Mehmet Selim KARTAL.
“Turkish Passport” kinosunda o uzak günnär için annadêrlar dokumentlär, türk diplomatların evlatboyları hem o insannar, kim türk diplomatların yardımınnan, kurtuldu büük Holokost zulumnuundan.
Foto – moldpres.md
