Çiçek ayın 15-dä Komrat kasabasının baş meydanında Gagauziya Başkanı İrina VLAHın inaguraţiyası oldu. İnaguraţiyada pay aldılar Moldova Parlamentın başı Andrian KANDU, Moldova primyer-ministrusu Kiril GABURİÇ, Moldova Mitroplitı VLADİMİR, Türkiye Büükelçisi Mehmet Selim KARTAL, Rusiya Büükelçisi Farit MUHAMETŞİN, Türkiye Respublikasının Büük Milli Meclisin deputatı İsamil SAFİ, başka devletlerin büürkelçileri, deputatlar, Gagauziyanın eski başkannarı, popazlar, kultura hem cümne insannarı.
İnaguraţiya günündä pek gözäl hem aydın bir havaydı. Meydan dop-doluydu. Burayı gelmiştilär Gagauziyanın herbir köşesindän insannar. Hepsinin üzleri şılardı, hepsi şendi.
İnaguraţiya başladı ondan, ani meydandan sţenaya dooru, duhovoy orkestranın marş havası çalmasınnan, şan karaulu çıkardı Moldovanın hem Gagauziyanın bayraklarını. Nedän sora Gimnalar çalındı.
İnaguraţiya yapıldı Gagauziya Halk Topluşun maasuz ofiţial toplantısında. Onun için inaguraţiyanın açılış sözünü tuttu GHT Başı Dimitriy KONSTANTİNOV. Sora söz verildi Gagauziya Merkez Seçim Komisiyasının başına Valentin KARAya, angısı bildirdi seçimnerin sonuçlarını. Nedän sora da Komrat Apeläţiya palatasının başı Afanasiy KURDOV bildirdi, ani Apeläţiya palatası İrina VLAHın başkan hakını tanıdı.
Nedän sora İrina VLAHa Gagauziya Başkanı kimnii verildi hem Canabisi Başkan eminini verdi. Sora da Gagauziya Başkanı İrina VLAH, insannara danışarak, kısadan nasaat etti. Nasaatında Canabisi tekrar urguladı, ani “Gagauziyada raatlıın hem barışın garantı olacek hem avtonomiyanın intereslerini herkerä hem herzaman koruyacek”.
Sora söz aldı Moldova Parlamentın başı Andrian KANDU. Canabisi 3 dildä (gagauzça, moldovanca hem rusça) kutladı Gagauziyanın eni başkanını hem urguladı, ani “Gagauziya Başkanınnan hem Halk Topluşunnan faydalı diolog olmasına umut eder”.
Moldova primyer-ministrusu Kiril GABURİÇ, kutlayarak İrina VLAHı, açıkladı, ani “Moldova pravitelstvosu herkerä Canabinizin yanında olacek hem herbir işi yapacek, ani avtonomiyanın insannarının yaşamasını kolaylaştırmaa deyni”.
Mitroplit VLADİMİR baaşladı Gagauziya Başkanına İrina VLAHa “Вера, Надежда, Любовь и мать их София” ikonasını hem bir büük klisä kiyadını da umut etti, ani “eni başkan inannan, umutlan hem sevgiylän çalışacek Gagauziya insannarın iilii için, kullanıp kendi çalışmalarında diil sadä juridika zakonnarını, ama Allahın sözünü da, allahlı zakonnarını da”.
Rusiya Büükelçisi Farit MUHAMETŞİN umut etti, ani Gagauziyanın Rusiya regionnarınnan annaşmaları, avtonomiyanın ilerlemesindä fayda getirecek.
Türkiye Büükelçisi Mehmet Selim KARTAL açıkladı, ani “ileri dooru da, nicä şindiyä kadar, Türkiye Gagauziyaya yardımcı olacek hem herzaman, paalı kardaşlarımızın yanında olacek”.
Kendi kutlamalarını açıkladı Gagauziyanın eski başkanı Mihail FORMUZAL da.
İnaguraţiyanın ofiţial bölümü bittiktän sora büük bir konţert oldu. Konţerttä pay aldılar Moldovadan hem Gagauziyadan türkücülär hem ansamblilär.
