Çiçek ayın (aprel) 20-21 günnerindä Gagauziya Başkanı İrina VLAH Rusiyaya ofiţial bir vizit yaptı. Vizit programasında Canabisi buluştu Rusiya Federaţiyasının (RF) pravitelstvosunun predsedatel yardımcısınnan Dimitriy ROGOZİNnan, RF Federal migraţiya slujbasının başınnan Konstantin ROMODANOVSKİYlän, Moskva bölgesinin viţe-gubernatorunnan Yuriy OLEYNİKOVlan, bildirer Gagauziya Başkanın haber merkezi.
Gagauziya Başkanı İrina VLAHın RF pravitelstvosunun predsedatel yardımcısınnan Dimitriy ROGOZİNnan buluşmasında incelendi soruşlar, ani ilgili Rusiyanın Gagauziya ekonomikasına yapılacek invistiţiyalarlan, Gagauziyadan Rusiyaya mal satmasınnan, Rusiyaya gagauz migrantların iş bulmasınnan hem başka problemalarınnan.
Moskva bölgesinin viţe-gubernatorunnan Yuriy OLEYNİKOVlan buluşmada annaşıldı kurmaa bir plan, angısına görä örüyecek işbirdlii annaşması, ani imzalandı 2015-ci yılın Küçük ayın 10-da Gagauziya hem Moskva bölgesinin arasında.
Rusiyanın Federal migraţiya slujbasının başınnan Konstantin ROMODANOVSKİYlän buluşmada söz gitti Rusiyanın migraţiya zakonun özellikleri için, Rusiyada bulunan Moldova vatandaşların soruşları için hem Gagauziyadan migrantlara iş erleri için.
Hepsi buluşmaklarda Gagauziya Başkanın İrina VLAHın yanında bulundu onun dışekonomika soruşlarında danışmanı Yuriy YAKUBOV.
