Hederlez ayın (may) 8-dä, Çöşmä küüyün eski primarın Pötr ÇEBANın teklifinä görä, Türkiye Büükelçisi Mehmet Selim KARTAL bu küüyä ofiţial olmayan bir vizit yaptı. Canabisini Çöşmä küüyndä okadar beklärdilär, ani herbir buluşmasında kendisini şenniklän, çiçeklän hem tuz-ekmeklän karşladılar.
Küüyün girişindä Mehmet Selim KARTALı hem onunnan bilä gelän gazetamızın baş redaktorunu Todur ZANETi tuz-elmeklän karşladılar küüyün insannarı, eski primarı hem şindi primarlaa kandidat Pötr ÇEBAN.
Küüyün gözäl peyzajınnan tanıştıktan sora, ilk buluşma noktası küüyün gimnaziyası oldu. Burada üüsek musaafirlerä tuz-ekmeklän hem çiçeklän karşı çıktılar gimnaziyanın direktoru Konstantin MOMÇA, üüredicilär hem milli giimnerinä giimni üürencilär. İkramnardan hem konuklamaktan sora, üürencilär kapu önündä halk oyunnnarını oynadılar. Nedän sora da gimnaziyanın “Gagauz Dili” klasında Büükelçi Mehmet Selim KARTAL, yazıcı Todur ZANET hem Çöşmä küüyün çorap fabrikasının adminstratoru Pötr ÇEBAN için kısa bir konţert gösterildi, angısını hazırladılar üüredicilär Marina ŞEKERLİ hem Ekaterina BERBER. Konţerttä uşaklar gagauz dilindä peetleri söledilär, türkü çaldılar hem gagauz oyunnarını oynadılar. Bu şennik bittiynän Büükelçi Mehmet Selim KARTAL kısa bir nasaatta şükür etti uşaklara, gimnaziyanın direktoruna hem üüredicilerinä bölä sıcaklı karşlamak için hem gözäl konţert için.
Gimnaziyadan sora musaafirlär küüyün “Çöşmecik” uşak başçasına uuradılar. Burada Canabilerini tuz-ekmeklän karşladılar uşak başçasının direktoru Vera URUM, medii Mariya KÖSÄ, terbiedicilär hem uşaklar. Birazdana, büük başta, üüsek musaafirlerä deyni uşaklar türkü çaldılar hem musaafirliktä bulunan Todur ZANETin peetlerini okudular. Kendi tarafından gagauz yazıcısı uşaklara deyni kendi peetlerini okudu hem Türkiyedä tiparlanan “Böcecik” kiyadını baaşladı.
Gözäl hem kıvrak konţert bittiktän sora Büükelçi Mehmet Selim KARTAL şükür etti hepsinä bu büülü kıpımnar için hem baaşladı uşak başçasına tatlıları. Uşak başçanın direktoru da kendi tarafından baaşladı Canabisinä uşakların el yaratmalarını hem Gagauziya için bir albom. Nedän sora konuşma birär çaşka kofe masasında ilerledi. Sora da direktor Vera URUM tanıştırdı Mehmet Selim KARTALı uşak başçasının aulunnan hem o donaklı işlärlän, ani burada analar-bobalar ellerinnän yapılmış: aaçtan tavşamnar, skatlardan kuu kuşları, çeburaşka, fil hem başka.
Uşak başçasından sora Çöşmä küüyün çorap fabrikasınnan tanışma oldu. Burada da üüsek musaafirleri tuz-ekmeklän hem çiçeklän karşladılar. Fabrikanın adminstratoru Pötr ÇEBAN annattı o tehnologiyalar için, ani kullanılêr burada hem maasuz urguladı, ani fabrikada tezdä eni oborudovaniye kurulacek. Fabrikanın zaametçilerinnän hem ţehlarınnan tanıştıktan sora Pötr ÇEBAN baaşladı musaafirlerä o mallardan, ani burada yapılêr – çeşitli renklerdä çorap.
Büükelçi Mehmet Selim KARTALın Çöşmä küüyünä vizitı uzun vakıt sürttü. Vizit zamanında kolayı oldu buradakı imeklärlän da tanışmaa, angılarını büük aşçı ustalıınan hazırlamıştı Pötr ÇEBANın eşi – Nina.
Anaktar sözlär : Çöşmäküüyü, Gagauziya, Mehmet Selim KARTAL
