Biz artık yazdık, ani Harman ayın (avgust) 28-dä Kıpçak küüyün Kurban Günündä büük bir tragediya oldu: bayker (motoţikla) şousunda 9 kişi yaralandı. Zerä, şou yaparkana iki motoţikla uruldu da onnarın birisi, tutuşup, siiredicilerin üstlerinä urdu. 9 kişi yaralandı.
Gagauziyanın saallık hem soţial korumak Upravleniyanın başı Aleksey ZLATOVÇEN bildirdi, ani Harman ayın (avgust) 28-dä Kıpçakta bayker (motoţikla) şousunda yaralanan kıpçaklıyka Mariya KÖR raametli oldu.
İlktän Mariya KÖRu Çadır bolniţasında tutndular yılaçlamaa. Ama görüp, ani faydası yok, onu Kişinevun respublika bolniţasına geçirmişlär. Ama burada da insana yardım edämemişlär. Ceviz ayın 10-11 gecesi Mariya KÖR raametli olmuş.
Kıpçak küüyün primarı Oleg GARİZAN açıkladı ani, ne kendisi, ne da primariya bayker (motoţikla) şousu yapmaa izin vermemişlär. Poliţiya da bildirdi, ani onnardan da bu şouya izin verilmemiş.
Nicä da olsa izinsiz bayker (motoţikla) şousu bir canı aldı. Kalan 8-zi da aar yaralı, yılaçlanêrlar.
