2015-ci yılın Harman ayın (avgust) 31-dän Ceviz ayın (sentäbri) 3-dän Moldova Respublikasının Milli Bibliotekasında XXIV-cü Halklararası Kiyat Salonunu gecti.
Bu yılkı Salon baaşlandı onun kurucusuna, bibliologa, yazıcıya hem poeta, Milli Bibliotekasının direktoruna, filosofiya bilgilerindä doktora Aleksey RÊUya. Canabisi bıldır raametli oldu.
XXIV-cü Halklararası Kiyat Salonda sergilendi 8 bin kiyada yakın, angılarını getirdilär 15 devlettän basım evleri.
Salonun kapanış günündä en meraklı hem en islää kiyatların avtorlarına hem basım evlerinä Salonun ödülleri verildi. Ödül alannarın arasında oldu gagauz yazıcısı hem poetı Todur ZANET ta, angısına verildi ödül “Benim bir kabaatsız kırılan GAGAUZ Halkıma REKVİEM” için.
