Kasımın 16-17 günneri arasında, Moldova Respublikası delegaţiyasının azası olarak, Gagauziya Başkanı İrina VLAH Brüseldä bulundu. Burada Canabisi Evroparlament, Crisis Management Initiative kuruluşunnan birliktä “Politikalı geçiş hem barış proţesları: milli parlametların opıtları hem parlamentlar arası dialogun rolü” konferenţiyasına katıldı.
Konferenţiyada nasaat ederäk, Gagauziya Başkanı “Gagauziya (Gagauz Eri) özel hak statusu için” Zakonun işlemesindä durgundu. Canabisi urguladı, ani büünkü gündä duruma gölä Moldova merkez kuvetleri bu zakonun çok erlerini hiç esaba almêêrlar. Bunu gösterer o, ani Gagauziyada bulunan erindeki sudlar may hiç esaba almêêrlar yada pek siirek bakêrlar erindeki zakonnara. Bu “Gagauziya (Gagauz Eri) özel hak statusu için” Zakonuna ters gidän bir durum.
Ayırıca Moldova Parlamentına yollanan Gagauıziya Halşk Topluşun teklifleri da hiç esaba alınmêêr.
İrina VLAH açıkladı, ani merkezdeki kuvetlär hepsini yapêrlar Gagauziyanın kuvedini kesmää deyni. “Gagauziya (Gagauz Eri) özel hak statusu için” Zakonuna karşı gideräk onnar Gagauziyada açêrlar Moldova pravitelstvosunun ofislerini. Hiç sormadaan Gagauziya öndercilerinä poliţiyanın, speţslujbaların, üstolan slujbaların hem prokuraturanın başlarına koyêrlar kendi insannarını. Gagauziyanın insannarı sa Moldovanın may hiç bir kuvet organnarında yok.
Administraţiya uurunda da, Moldova Respublikasının Konstituţiyasına ters gideräk, Gagauziyayı rayon hem kasaba kertiinä indirdilär.
Dışardan gelän finans yardımını payedärkana Gagauziyayı may esaba almêêrlar. Gagauz dilini hem kulturasını korumaa deyni Moldovanın merkez bücetindän damna gibi para veriler. Moldovada yok bir devlet programası Gagauziya insannarını respublika uurunda cümne-politika proţeslerinä katmaa deyni.
Başkan açıkladı, ani pek yazık ona, ki eni parlamentta yol verilmedi moldovan hem gagauz zakonnarın garmonizaţiyası için kurulan ortak komisiyanın çalışmasına.
Danışarak halklararası cümneyä Gagauziya Başkanı dedi: “Bän danışêrım halklararası cümneyä arka olsunnar OBSE kanadı altında kurmaa hem finans etmää halklararası iş grupasını, respublika hem regional zakonnarın garmonizaţiyasında ortak zakonnarı hazırlamaa deyni. Hem da Kişinevun hem Komradın arasında toplanan ters işleri sırasınca adımnamaa deyni”.
İrina VLAH urguladı: “bu zor hem sancılı bir proţes, maasuz politikacılara deyni”, ama “Moldova Respublikasının politika boyu kendisini olmuş göstersin da, sonda, işitsin kendi vatandaşlarını, ani Gagauziya avtonomiyasında yaşêêrlar”.
