Kasım ayın 22-dä anılmış gagauz estrada ansamblisi “Serin Su” kendi 25-ci yıldönümünü kutladı. Kutlama toplantısı hem konţertı Komradın kultura Evindä oldu. “Serin Su” ansamblisini kutlamaa deyni geldilär Gagauziyanın hem Komradın öndercileri, kultura insannarı, ansamblinin dostları hem sıradakı insannar.
Annadarak ansambli için onun öndercisi Födor RADİONOV dedi: “En zor vakıtlarda biz becerdik korumaa ansambliyi, zerä salt birliktä biz vardı nicä ayakta kalalım. Bu da bizim en büük kazancımız. Hem, ani büün biz birliktä kutlêêrız gözäl bu yortuyu – bu da kazancımız.
Bizim çok plannarımız var, ama o plannarın en büük başarısı – insannara gözäl hem olmuş türkülär baaşlamaa. Bunda da bizä yardımcı olêrlar bizim anılmış poetlarımız Todur MARİNOGLU, Todur ZANET, Pötr MOYSE”.
Eridir sölemää, ani poetların peetlerinä bütün muzıkayı yazêr Födor RADİONOV. Yıldönümü konţertindä da hepsi o türküleri “Serin Su” ansamblisi baaşladı siiredicilerä.
Ansambli, Gagauziyadan kaarä, çok erlerdä kendi becerikliini gösterdi. 1993-cü yılda “Serin Su” Tatarstanda (RF) gençlik festivalindä pay aldı. Sora Türkiyedä halklararası festivaldä.
Ama nicä deer kendisi Födor RADİONOV: “Bizim için en paalı oldu festival «Днестровские зори» (“Dnestr dannarı”). Bu festival avtor türkülerin festivaliyadi. Biz orada, 130 türküdän 3-cü eri aldık”.
Büünkü gündä “Serin Su” ansamblisindä var 9 muzıkant hem solist. Allaa onnara saalık, uzun ömür hem yaratmak kolaylıı versin.
