Hederlez ayın 10-da gagauzların apostolunun, aydınnadıcısının hem din adamının, Protoierey Ay-Boba Mihail ÇAKİRin byustu okundu hem kolivası kaldırıldı Byustun yapılması hem koyulması için 49 bin ley para Gagauziya İspolkomun, demeli bütün gagauzların tarafından, verildi.
Byustun okumasını hem ayazmaylan serpilmesi slujbasını Gagauziya kliselerin popazlarınnan birliktä yaptı Komratlan Kaulun episkopu ANATOLİY.
Dualar bittiktän sora Komratlan Kaulun episkopu ANATOLİY serpti ayazma byusta hem teklif etti kolivadan almaa. Sora da Mihail hem İrina ÇAKİRlerin cannarı için pona verildi.
O günü Ay-Boba Mihail ÇAKİRin byustun okumasında hem kolivanın kaldırılmasında pay aldılar Gagauziyanın hepsi baş öndercileri hem GHT Başı: Gagauziya Başkanı hem İspolkomun predsedateli İrina VLAH, Gagauziya Halk Topluşu Başı Dimitriy KONSTANTİNOV İspolkom predsedatelin 1-ci yardımcısı Vadim ÇEBAN; İspolkom predsedatelin yardımcısı Olesä TANASOGLU, kultura hem turizma Upravleniyanın başı Vasilisa PETROVİÇ, “M.Maruneviç” adına bilim-aaraştırma merkezin direktoru Pötr PAŞALI. Büük katkıda bu sıraya bulundu Modova gagauzların cümne kuruluşun başı Nikolay TERZİ.
Bundan karä bu ayozlu gündä Ay-Boba Mihail ÇAKİRin hem onun eşinin İrinanın mezarına geldilär gagauz yazıcıları Pötr ÇEBOTAR hem Todur ZANET, angıları mezar bulunduynan, o mezarda 2000-ci yılın Baba Marta ayın 21-dä ilk duayı yaptıydılar hem Ay-Boba Mihail ÇAKİRin hem onun eşinin İrinanın mezarına birär filcan şarap hem su döktürdülär.
Vardı bu günü mezarda gagauzların başka bilim, kultura hem cümne insannarı da.
Not. Ay-Boba Mihail ÇAKİRin eski byustu, ani yapılıydı bakırdan hem 2011-ci yılın Kırım ayın (dekabri) 12-dä Gagauziya İspolkomun tarafından koyulduydu bıldır, Harman ayın (avgust) 15-dä, çalındı (bak: http://anasozu.com/barbarlik-mihail-cakirin-byustunu-calmislar/).
Ay-Boba Mihail ÇAKİRin eni byustu onun duuma günündän 155 yıldönümünä karşı mezarına koyuldu. O byustu mramordan yapıtı moldovan skulptoru Grigoriy RAYLÄN.
Patret – Gagauziya başkanın pres-slujbasının.
