Çadırdan gençlerin “Helal Örnek” cümne kuruluşu aslıya çıkardı kendi ilk büük proektını – “Ana tarafım – gözäl korafım”. Bu proekt Şveyţariya devletinin İlerlemä hem İşbirlii Upravleniyasının para yardımınnan yapıldı.
Nicä bildirdi “Helal Örnek” cümne kuruluşun başı hem proektın kordinatoru Viktor RUSEV “Bu işi yapmaa deyni fikirä geldik ozaman, açan gagauzların arasında bir aaraştırma yapıp, gördük, ani 32 yaşından yukarı gagauzlar gagauzça okumaa bilmeerlär. O insannar annêêrlar hem lafederlär gagauzça, ama yazmaa hem okumaa o dildä becermeerlär. Bu problemayı birazçık çözmää deyni da cümne kuruluşumuz karar aldı CD yolunnan onnarı Gagauz literaturasının bir parçacıınnan tanıştırmaa hem gagauz literaturasının klasiklerinä hem da genç poetlarına populerizaţiya yapmaa.”
CD diskında yaratmalar 5 bölümä paylaştırılı: 1. Literaturamızın sedefleri, 2. Uşaklara deyni yaratmalar; 3. Tanışın – eni adlar; 4. Fabula sergisi; 5. Çevirili yaratmalar.
Viktor RUSEV bildirdi, ani proektı alsıya çıkarmaa deyni çok insannar yardımcı oldular. Onnarın arasında yaratmaları okuyannar Vasiliy RUSEV hem Çadır milii teatrunun artistleri Elena DANACI, İlya HACI, Natalya İVANCUK, Valentina GÜMÜŞLÜ, Lübov KIVIRCIK, Mihail KONSTANTİNOV.
CD diskın Rejisöru oldu İlya HACI, muszıka cuvapçısı – Todur GAYDARCI, lingvist – Oxsana KONSTANTİNOVA, kordinator – Viktor RUSEV.
Hazırlanma materiallar 300 CD diskta yazıldı da o diskları bibliotekalara, şkolalara hem uşak başçalarına, kultura Evlerinä daadılacek. Bundan kaarä büütünn materiallar interneta da koyulaceklar.
