Hederlez ayın 14-dä Kongaz küüyün Todur ZANET liţeyindä geçti sergi “Gagauziya gençleri demokratiya paalılıkları için”, angısında pay aldılar gimnaziyaların hem liţeylerin üürencileri. Sergi hazırlandı “Success” cümne kuruluşu çalışmalarınnan hem “Pro-Evropa” Merkezin katkısınnan.
Sergiyä katıldılar Gagauziyanıın Baurçu, Başküüyü (Kirsova) Beşgöz, Kongaz, Kıpçak, Tomay küülerindän hem Komratlan Valkaneş kasabalarından üürencilär, Komrat Devlet Universitetın studentları hem da Moldovanın Taraklı rayonun Kayraklı küündän üürencilär.
“Gagauziya gençleri demokratiya paalılıkları için” sergisindä üürencilär hem studentlar sergiledilär duvar gazetalarını, resimneri hem el işlerini, ani annadêrlar hem açıklêêrlar gençlerin demokratiya paalılıklarına bakışlarını hem fikirlerini.
Serginin sonunda katılannara dünneyin, Evropanın hem Moldovanın politika kartaları hem Diplomnar verildi.
Not. Proekt yapıldı Caritas (Çehiya) kuruluşunnan ortaklıkta TRANSITION programasına görä hem onun para ayrdımı geldi Çehiya Respublikasının dışişleri minsterliindän.
