45 yıl geeri, 1971-ci yılın Hederlez ayın (may) 23-dä Gagauziyanın Beşalma küüyündä duudu oldu anılmış gagauz hem Rusiyanın aktöru hem rejisöru Saveliy KÖSÄ, Savuşka, nicä ona deyärdilär yakınnarı hem onu sevän dostları. Onun yıldırım gibi yaşaması büük hem aydınnnık bir iz braktı teatruluk kulturasının gökündä.
Saveliy KÖSÄ üürendi Kişinevun incäzanaat İnstitunun aktör hem rejisör fakultetında. Neredä ona üüredicilik yaptılar anılmış moldovan hem gagauz teatru uurunda pedagoglar: Dionis TANASOGLU, Pötr ARABACI, Valeriy MOGUTENKO, Todur ZANET h.b. Bu institutu 1992-ci başardıktan sora Saveliy KÖSÄ gitti Moskvaya da girdi üürenmä GİTİSa (Российский университет театрального искусства) angısını başardı 1998-ci yılda.
İşledi Mossovet adına teatruda hem “Step Haus” şou-revü uşak şkolasında.
2004-cü yılda Rusiyanın Gosteleradiosunda oldu spiker hem radio rejisöru. JK “Korona”nın “Svetläçok” adına Uşak klubunda aktör hem söz ustalıında pedagog işledi.
Aktör olarak Saveliy KÖSÄnin debüt rolleri ana Vatanında oldu: Molyerın komediyasında “Jorj Danden yada aldadılmış koca” – Lüben; Jan Rasinin pyeasında “Bayazid”– Bayazid (1992). Sora da, artık Rusiyada işlärkana, Saveliy KÖSÄ geldi Gagauziyaya da, rejisör olarak, Komratta «Женитьба» hem «Гарнир по французски» spektaklilerini koydu.
Saveliy KÖSÄ Mossovet adına teatruda çok spektaklilerdä oynadı: «Два веронца» (diplom spektaklisi) – Valentin; «Страсти по Митрофану» – Milon; «Скандал, скандал» – Kerless; «12-ая ночь» – Valentin; «Венецианский купец» – Kupeţ.
Başka teatruların spektaklilerindä: «Потоп» (O. ANOHİNAnın antreprizası) – Higins; «Дама ждет – кларнет играет» – Pol; «На плоту» – Malıy.
Saveliy KÖSÄ aktör olarak kinolarda hem seriallarda da pay aldı: «Страна глухих» (1998); «Крылья», «Саломея», «Дальнобойщики» (2001); «Мужская работа 2» (2002); «Игра на выбывание» (2004); «Обреченная стать звездой» (2005); «Преступление будет раскрыто», «Город соблазнов» (2009); «Зоя» (2010); «Дежурный ангел 2» (2012).
Saveliy KÖSÄ pek sevärdi paalı gagauz dilini. “Bucaan dalgasında” radio koverimnerdä o pek talantlı okuyardı gagauz yazıcıların peetlerini hem annatmaklarını.
Saveliy KÖSÄ raametli oldu 2013-cü yılın Büük ayın 3-dä, Moskvada. O gün gagauz gagauz kulturasında, gagauz teatruculuunda büük bir kayıp günü oldu. Ama Saveliy KÖSÄ, Savuşka heç bir kerä unudulmayacek hem onun adı kulturamızın istoriyasından silinmeyecek.
Akademik poet hem dramaturg Todur ZANET
