Harman ayın (avgust) 19-da Komratta Gagauz Respublikasının kurulmasının 26-cı yıldönümü bakıldı. Kutlama sıraları başladı Şan Aleyasında Gagauz Respublikasının kurulmasını anan taftaya çiçek koymasınnan.
Çiçek koymasında pay aldılar Gagauz Respublikasını kuran insannar, Gagauziya öndercileri, Halk Topluşu deputatları, İspolkom azaları, büükelçilär, diplomatlar, politika partiyaların temsilcileri.
Sora Komrat Kultura Evindä oldu Gagauz Respublikasının kurulmasının 26-cı yıldönümünä baaşlanan yortulu toplantı.
Kutlama yortusunda, Gagauziya öndecilerindän hem Gagauz Respublikasını kuran insannardan kaarä, pay aldılar Amerika Birleşik Devletlerin Kişinev Büükelçisi Jamez D. PETTİT, Rusiya Federaţiyasının Kişinev Büükelçisi Farit MUHAMETŞİN, Kişinev TİKA kordinatorluk Ofisin kordinatoru Canan ALPASLAN.
Gagauz Respublikasının kurulmasının 26-cı yıldönümünnän ilgili olarak gagauz halkına kutlama mesajlarını yolladılar Soţialistlär partiyasının hem “Bizim partiyamız” partiyaların başları.
Başarıldı yortulu toplantı büük bir konţertlan. Bundan kaarä bütün gün Komratta sport yarışmaları da oldu.
Gagauz Respublikasının kurulmasının 26-cı yıldönümü kutlama günündä Rusiya Federaţiyası baaşladı Gagauziyaya beş mikroavtobus.
