Gagauziyanın “Aydınnık” cümne kuruluşun başı Viktor KOPUŞÇU açıkladı hem gösterdi, ani dünneyä geldi “Oglan masal okuyêr” kiyatların birincisi.
Kiyat yapılı kompyutor grafikasında çift resimnärlän: sol sayfada – masaldan renkli bir resim, saa sayfada sa – o resimin sade çizisi, angısını uşaklar lääzım boyasınnar sol resimin boyalarına görä.
“Aydınnık” cümne kuruluşun başı Viktor KOPUŞÇU söledi, ani kiyadın sponsorları var, ama Canabisi o sponsorların adlarını açıklamadı.
Kiyadı hazırladı Viktor KOPUŞÇU, kompyutor resimneri – Olga STAMOVA.
Viktor KOPUŞÇUnun taa ilerki açıklamalarından üürendik, ani bu türlü kiyatlar başka seriyalarda da (şkola, gagauz oyunnarı, gagauz imekleri h.t.b.) dünneyä geleceklär. O kiyatlar A-4 formatında basılaceklar hem satılaa çıkarılaceklar. Esaba alarak, ani kiyatlar renkli hem kaliteli kiyatta tiparlanacek, beklener, ani onnarın satış paası da paalıca olacek.
