Gagauziyanın Aydar küüyünün F.A. ANGELİ adına gimnaziyası kurulmasından 175-ci yıldönümünü kutladı – sayılêr, ani bu şkola hem taa 21 gagauz küülerindä ilk şkolalar açıldılar 1841-ci yılın Kırım ayın (dekabri) 2-dä.
Aydar şkolasının kurulma gününü buldu küüyün istoriyasının araştırmacısı Födor KURU, angısının açıklamalarından üüreneriz, ani Aydar kliseinin yanında açılmış hem o sadä çocuklar içinmiş. Şkolada varmış bir klas (13-17 kişi) hem üürenmäk 3 yıl sürtärmiş.
175 yılın içindä şkola 9 kerä statusunu hem büüklüünü diiştirdi. Ama, nicä söleer gimnaziyanın büünkü direktoru Nadejda Pantileevna KOÇANCI “şkolanın üüredicilik temeli diişmedi. Bu temel – saygı hem sevgi. Büün da gimnaziyanın kuralı – “İlktän sevmää, sora terbietmää!” Bu lazungu kendilerinä deyni aldılar o insannar da, ani şkolamızı bitirdilär. Onnarın arasında var üüredicilär, doktorlar, injenerlar, yazıcılar, politikacılar, bilgiçlär”.
Kendi yıldönümünü Aydar gimnaziyası büük bir yortulu sıraylan baktı – «Школа живет не старея, все было будто бы вчера». Bu sırada, saygı hem sevgi laflarınnan, kendi üüredicilerinä hem şkolasına danıştılar: yazıcı hem poet Pötr ÇEBOTAR, araştırmacı Födor KURU, GHT deputatı Z.İ. POPAZ, gimnaziyanın ana-boba birliin başı G.G. KAPSAMUN, vıpuskniklär P.D. TERZİ hem İ.A. KALAK.
Gagauziyanın adından gimnaziyanın kolektivına kutlama sözlerinnän danıştılar hem baaşışlar getirdilär Gagauziyanın üüredicilik upravleniyası başın yardımcısı V.S. MİRON hem Bilim Merkezin zaametçisi G.D. RADOV.
Aydar gimnaziyasının 175-ci yıldönümünü kutlaması büük şenniklän hem gramotaların daadılmasınnan geçti. Konţerttä üürencilär türkü çaldılar, oyun oynadılar hem peet okudular.
Not. Biz da, “Ana Sözü” olarak, kutlêêrız Aydar küüyün F.A. ANGELİ adına gimnaziyasının kollektivını, üürencileri hem üüredicileri bu gözäl yıldönümünnän. Allaa versin sizä saalık, uzun ömür, saygı hem sevgi!
