2014-cü yılın Kirez ayında (iyün) TİKA (Türk İşbirlii hem Koordinaţiya Agenstvosu) baaşladı Gagauziyanın kultura hem turizma Upravleniyasına bir ses studiyası. Studiyayı Çadır kasabasında erleştirdilär hem ona Gagauziyanın Regional ses studiyası statusu verdilär.
2017-ci yılın Büük ayın 1-dän beeri bu studiyanın direktoru oldu anılmış gagauz kultura adamı, kompozitor hem “Çayır” (CHAiR) rock-grupanın öndercisi Mihail KULEV.
Maasuz “Ana Sözü” gazetası için Mihail KULEV bildirdi, ani Gagauziya Halk Topluşu kararınnan studiyaya iki stavka verildi: studiyanın direktoru hem ses rejisöru stavkaları. Ama bu stavkalar salt 60% ödener. Onuştan kalan 40% studiya kendi terinnän lääzım kazansın.
Mihail KULEV bildirdi, ani studiyada parasız yazılaceklar hepsi kolektivlar hem artistlär, ani bulunêrlar Gagauziyanın kultura hem turizma Upravleniyasının hem onun bölümnerinin ştatında. Kalan insannar hem ansamblilär bu studiyada sadä para karşılıına yazılacek. Paralar doorudan Gagauziyanın kultura hem turizma Upravleniyasına gidecek.
Gagauziyanın Regional studiyasının direktoru Mihail KULEV açıkladı, ani yazılmak isteyennär lääzım doorudan danışsınnar Gagauziyanın kultura hem turizma Upravleniyasına (telefon: + 373 298 2-49-35) yada direktora kendisinä (telefon: + 373 785 29 709).
PATRETTÄ: (soldan) Vladimir GOLUBŢOV (ses rejisöru) hem Mihail KULEV.
